Publiká riba 19 Aprel 2020
Willemstad – Djasabra último, 18 di aprel 2020, Direktorado di Komunikashon di Gobièrnu di Kòrsou, a anunsiá ku ta bai tin rekonstrukshon di e sala di prensa na Fòrt Amsterdam 17. Ta trata aki di un proyekto ku a kuminsá for di aña pasá, ougùstùs 2019, kaminda a opta pa invertí i rekonstruí parti paden di e sala pasó dia a renobá e edifisio prinsipal di fòrti na 2016, a drecha solamente e kaskada i tur e fasilidatnan pa mehorá un mihó servisio pa informá nos komunidat pa medio di prensa mas mihó, a keda limitá.
Mesora Gobièrnu ke rekonosé ku nos pais i hopi siudadano ta den un situashon di hopi reto finansiero i ke enfatisá ku e proyekto aki a keda finansiá for di aña pasá i ku ta awor numa e produktonan pa rekonstruí e sala por a yega for di eksterior. E retraso aki ta puramente pa motibu di entre otro Corona Vírùs ku a alargá e periodo di karga imensamente. Ke men Gobièrnu no ta hibando un práktika iresponsabel di hasi invershon den un sala, na un momento ku netamente hopi hende ta pèrdè trabou. Ta trata aki simplemente di un ehekushon di un proyekto ku for di aña pasá a keda finansiá.
E propósito di e mehoransa ta pa krea mihó iluminashon i fasilidat pa prensa por sinta trankil i skibi i/óf pone su ekiponan di grabashon riba mesa. Ademas, lo krea e posibilidat pa kada prensa tin su propio mikrófono dediká i prensa no ta obligá mas pa bin ku su propio kamara, pasó ful e sistema a keda outomatisá i por piki señal libremente for di esaki. Ku e sistema outomatisá aki, Gobièrnu tambe ta spar hopi sèn mensualmente i tur prensa por haña zonido te kaminda ku nan ta sintá, p’asina nan klientenan por skucha e Konferensha di Prensa sin ningun problema. Finalmente, e sistema akústiko ta bai drecha imensamente pasó banda di tapeit, ta pone tambe algun sistema pa mehorá i deshasí di e zonido hòl ku tin den e sala i tur e invitadonan i kamara patras lo ta riba un nivel mas haltu di manera ku tur hende por mobilisá dilanti di kamara sin problema.
E sala lo keda uzá tambe pa reunion, treinen i kualke otro aktividat ku e por akapará. A opta pa hasi e kambio aworaki pasó lastimamente e situashon di Covid-19 ta trese un reto èkstra kuné ku Gobièrnu no sa te ki dia esaki ta pasa. Ke men a opta pa hala un liña i ehekutá esaki p’asina pronto prensa por tei bèk den un sala mehorá.
Mientras tantu, tur Konferensha di Prensa ta tuma lugá digital komo ta hopi esenshal pa mantené e distansia sosial i físiko den e periodo difísil aki ku Corona Vírùs a krea pa Kòrsou. Ya kaba a hasi un tèst ku tur e prensanan ku normalmente ta bishitá konferensha di prensa, p’asina pèrkurá ku tur kos ta kana bon. E frekuensia di Konferensia di Prensa ta keda similar, esta djaluna i djaweps i si tin informashon èkstraordinario, lo yama esaki tambe.
Direktorado di Komunikashon di Gobièrnu di Kòrsou ke gradesí tur medio di prensa pa nan koperashon i lo sigui traha na adelanto di un mihó komunikashon i informashon pa komunidat.
