Lo kontrolá pèrmit, stabilidat, i altura di tur stellage, stent, trailer, i ‘steiger’ riba ruta di Karnaval
Publiká riba
22 Yanüari 2024
Willemstad – Projectteam Toezicht en Handhaving (PTH) di VVRP lo bai kontrolá pèrmit, stabilidat, i altura di tur stellage, stent, trailer, i ‘steiger’ riba ruta di Karnaval.
Meta di e kontrolnan aki ta pa garantisá seguridat di tur persona ku ta bai disfrutá di marchanan di Karnaval.
Pèrmit di prekario:
E kliente mester tin su pèrmit huntu kuné na momentu ku PTH bin pa kontrolá. Tambe lo chek si e konstrukshon ta riba e tereno indiká den e pèrmit.
Stabilidat di e konstrukshon:
PTH lo chek si e konstrukshon ta para stabil riba su kurpa sin ta move òf sakudí, sea kompletu òf parsial, na momentu ku subi riba dje. PTH lo tira bista tambe riba entre otro ophetonan skèrpi, i si e dak ta bon pegá.
Altura di e konstrukshon:
Tin un máksimo di 4 meter pa kada konstrukshon durante temporada di prekario pa karnaval. PTH lo kontrolá esaki tambe.
Na momentu ku konstatá kualke iregularidat, PTH lo pone e doño di e pèrmit na altura pa e laga drecha esakinan mas pronto ku ta posibel.
Lo hasi diferente kòntròl promé, durante, i despues di e diferente marchanan.
