Publiká riba 04 Òktober 2023
Willemstad – Luna di òktober ta luna Internashonal di Seguridat Sibernétiko. Minister Charles Cooper ta para ketu na e importansia di Seguridat Sibernétiko aki na Kòrsou.
Seguridat Sibernétiko ta birando mas importante. Mundu i téknología ta ávansando rapidamente i mayoria di nos ta dependé di diferente sistema digital i konekshon ku internèt pa nos bida diario. Tambe kada dia mas di nos datonan i informashonnan personal ta keda wardá den sistemanan digital ku ta asesibel via di internèt. Esaki no ta konta solamente pa kada suidadano, pero tambe pa gobièrnu i empresanan privá i públiko.
Seguridat Sibernétiko ta importante pa salbaguardiá e datonan i informashonan aki kontra entre otro ladronisia, pèrdidá òf maluso.
Kontra atakenan sibernétikó, ku ta tur intento pa hòrta, eksponé, daña òf distruí datonan ditgital pa medio di un akseso no outorisá di sistemanan digital, por tuma diferente medidanan di prótekshon.
Konsiente di tur e riesgonan di un atake sibernétiko, Minister Cooper a bin ta duna bastante atenshon na e tópiko aki i proponé akshonnan. Esakinan ta entre otro pa Gobièrnu di Kòrsou lanta un komité ministerial pa kòrdina tur akshonnan den e kuadro aki, hiba kombersashon ku instanshanan internashonal ku lo por yuda Kòrsou, i kana e proseso pa lanta un Task Force nashonal pa atendé ku asuntunan di Cyber. Resientemente tambe Gobièrnu a apuntá Sr. Ingeniero Dwigno Puriel komo ‘kwartiermaker cyber’ pa e.o. operashonalisá e Task Force aki.
Minister Cooper ta hasi un yamada na komunidat pa hasi uso di sistemanan digital konsiente i seif. Gobièrnu lo duna informashon durante henter luna di òktober ku e meta pa konsientisá.
