MÈNOS REI NA SERVISIO DI IMPUESTO - Informashon tokante Gobièrnu di Kòrsou Bo opinion

Notisia

MÈNOS REI NA SERVISIO DI IMPUESTO

Geplaatst op 19 January 2017 dor di Ministerio Finansa

WILLEMSTAD- Na Regentesselaan por ripará bon ku e portal online pa hasi deklarashon di impuesto tantu pa negoshi komo partikular ta perkurá pa menos rei.  Servisio di Impuesto ta boga pa e aña aki motivá mas tantu hende posibel pa hasi nan deklarashon i paga impuesto online.  Esaki ta no únikamente lihé, pero ta tambe fasil i sigur.

Servisio di Impuesto di Kòrsou ta raportá ku den 2016 mas ku 55.000 deklarashon di negoshi i partikular a keda entregá via di e portal.  Den desèmber 8.867 deklarashon di negoshi a keda entregá, miéntras ku den mesun luna di e aña anterior a entregá 1.845 deklarashon online.

Prinsipalmente Impuesto di Benta (OB)
Deklarashon di OB ta loke mas a keda entregá: den 2016 esaki tabata 26.110.  Pero e portal online ta keda usá tambe hopi pa hasi deklarashon di Impuesto riba Entrada i primanan (17.984 den 2016) i seguro di malesa i invalides (ZV/OV.)  Pa seguro di malesa i invalides a drenta 8.470 deklarashon desde ku a introdusí e posibilidat pa deklará esaki na yüli 2016.  Den 2016 un total di 1.041 deklarashon di Impuesto riba Ganashi (WB) i 648 verzamelloonstaat a keda entregá.

Ministerio di Finansa aña pasá a tene diferente kampaña den medionan di komunikashon pa informá i motivá pa hasi deklarason atrabes di e portal online.  E kampañanan aki a resultá eksitoso.  Servisio di Impuesto lo sigui ku tipo di kampañanan aki pa informá i motivá e pagadó di belasting pa deklará i paga su belasting online. Rápido, fasil i sigur.

Gráfiko di e kantidat di deklarashon online hasí dor di negoshinan den 2016.

 

Ministerio konserní