Mandatario i Parlamentarionan ta entregá mas ku 25% di nan salario
Publiká riba 18 Ougùstùs 2020
Willemstad – E departamento di Gobièrnu enkargá ku salario a manda notifiká Konseho di Minister ku a hasi un korekshon na e skal di salario di Minister i Parlamentarionan. Ke men na lugá di skal 17, a koregí esaki i hasi’é skal 18 konforme un liña di maneho aktual. Apesar di esaki, Konseho di Minister a opta pa no kobra e diferensia di sèn ku nan lo mester haña, ku ta ekivalente na mas òf ménos 12.7%. Esaki ta nifiká ku aparte di e 25% ku Minister i Parlamentarionan mester a entregá konforme e kondishonnan di Hulanda, e Mandatarionan a opta pa entregá 12.7% èkstra ku a suma un total di mas òf ménos 37.7% total.
Ademas, no ta e intenshon pa subi pènshun ni ningun otro gastu di Gobièrnu ku e kambio di skal aki por trese kuné.
E mesun korekshon a keda hasí pa Parlamentarionan tambe i e Parlamentarionan tampoko lo no bai risibí ningun entrada nèto èkstra. A skohe konsientemente pa esaki pasó ta mas ku lógiko ku den un periodo fèrfelu ku Kòrsou ta den dje, no por ta skohe pa bai subi salario di Mandatario i Parlamentarionan.
