Publiká riba 05 Sèptèmber 2025
Komunikado di Prensa Konhunto
Willemstad – Minister di Asuntunan Eksterior Ruben Brekelmans a hiba un kombersashon ayera ku Promé Minister Pisas (Kòrsou), Gezaghebber Soliano (Boneiru) i un representante di Promé Minister Eman (Aruba) tokante e desaroyonan aktual den region, inkluyendo e despliegue di Merka den Laman Karibe.
Minister Brekelmans a enfatisá ku e mishon aktual di Merka ta enfoká primordialmente riba operashonnan anti-droga den awanan internashonal i ku Reino no ta involukrá den e operashonnan aki. Na mes momento Hulanda ta sigui den kombersashon ku e partidonan embolbí pa asina defendé interesnan di Reino.
Minister Brekelmans: “Nos ta un Reino. Ta netamente awor ta importante pa nos por informá otro di forma lihé, kompleto i kla. Asina konhuntamente nos por ta alerta, ofresé trankilidat i klaridat na nos komunidat i protehá nos ekonomianan.”
E gobernantenan karibense a enfatisá ku nos ta eksperensiando e situashon aki di aserka. I pa e motibu aki un komunikashon rápido i kla ta importante, p’asina por informá nos abitantenan i bishitantenan debidamente.
Durante e reunion a akordá pa sigui vigilá e situashon di serka i pa fortifiká liñanan di komunikashon eksistente i mantené un bon koordinashon ku otro.
