Publiká riba 01 Novèmber 2017
Willemstad – Servisio pa Obra Públiko (OW) ta anunsiá ku ta bai kuminsá ku trabounan di mantenshon nesesario na e viadukto di Breedestraat Otrabanda (paralelo ku Gallerosteeg). Trabounan ta kuminsá djaluna, 6 di novèmber benidero na e banda zùit, pues ta kuminsá na e banda di warda polis Otrabanda i tambe e otro banda ku ta banda di e parada di bus na Otrabanda, te na altura di e kantor di Selikor. Esaki ta e promé fase di e trabounan di mantenshon na e viadukto.
Trabounan intensivo na e diferente otro viaduktonan di Kòrsou ta òf a yega na fase final, a hasi mantenshon i reparashon na diferente parti , entre otro na e betòn, na e heru den e betòn i na e balustrada riba e viaduktonan. A yega turno pa e viadukto di Breedestraat Otrabanda. E trabounan ta wòrdu ehekutá den fase, komo tal lo kuminsá ku e parti zùit di e viadukto den e promé fase. E ta tuma tempu pa motibu ku ta trata di un renobashon struktural i duradero.
Kontratista Betonbouw NV, Obra Públiko i polis tékniko ta pidi públiko pa tene kuenta ku e trabounan. Ta pidi outomobilistanan pa tene kuenta ku personal i material di renobashon ora ta trafiká den besindario di e viadùkt. Pa kualke pregunta tokante e proyekto por tuma kontakto ku OW via e number 433-4237, Whats app +5999511-8582 òf via di e-mail info.vvrp@gobiernu.cw.
