Publiká riba 08 Novèmber 2017
WILLEMSTAD- For di Aprel di e aña aki Ministerio di Desaroyo Ekonómiko a bin ta organisa mensualmente un Marshe Sosial Ekonómiko riba Plasa Brion. E meta prinsipal ku kual MEO ta organisá e marshe aki ta pa nos hendenan bende òf eksponé nan produktonan lokal i di e manera aki aportá ku den futuro nan lo por habri nan propio empresa, trese mas bida den nos sentro di siudat i ta e deseo pa ku tempu e marshe bira un atrakshon turístiko.
Kada luna e marshe a bin ta krese inmensamente i ya nos ministerio ta preparando tur kos rondó di e último BETH pa e aña aki. Esaki lo ta dia 02 di desèmber próksimo di 16:00 pa 20:00or riba Plasa Brion manera ya ta e kustumber. Luna di desèmber komokiera ta un luna sumamente festivo i klaro ku nos ke aportá na e festividatnan aki ku e último BETH di 2017. Den e kuadro aki BETH di luna di desèmber lo djòin ku e anual Marshe di Pasku di Fundashon Kas di Kultura. Pues lo ta un marshe ku toke navideño i un variedat di presentashon i artikulonan di pasku.
Pa e marshe benidero tur partisipante mester registra di nobo. Pues apesar ku un persona a yega di partisipa na un di nos marshenan anterior, esaki mester registra di nobo pa e marshe di desèmber awor. Pa registrá por pasa personalmente na ofisina di Ministerio di Desaroyo Ekonómiko situá na (Pletterijweg 43, AmiDos Building (Parera) na nos resepshon na piso 4. Òf tambe por manda nos un email na info.mse@gobiernu.cw. Mirando ku BETH di desèmber lo ta konhuntamente ku Marshe di Pasku di Fundashon Kas di Kultura, partisipantenan lo por inskribí na Fundashon Kas di Kultura tambe (Scharlooweg #29) durante oranan di ofisina.
Inskripshon ta habrí te ku djabièrnè 17 di novèmber próksimo. Partisipantenan ku ta traha i bende artikulo i produktonan lokal pa fin di aña ta haña preferensia pa un stènt. Promé ku e marshe lo tin un anochi di informashon obligatorio pa tur partisipante di e marshe di desèmber.
Pa mas informashon tokante nos marshe Sosial Ekonómiko-BETH por tuma kontakto ku nos mandando un app na +599-9 522-4455 òf mandanos un mensahe personal via di nos página di Facebook. Pa informashon spesífiko tokante e Marshe di Pasku por tuma kontakto ku sra Dana Elisabeth na Fundashon Kas di Kultura via di e numbernan 434-7355, 434-73513 / 520-1544.
