Publiká riba 08 Mei 2019
WILLEMSTAD – Un grupo di 10 empleado públiko di Ministerio di Asuntu General a risibí nan karnèt ofisial komo prueba ku nan ta ofisialmente nombrá komo ʹbedrijfshulpverlenerʹ of ʹBHV-erʹ. E amtenarnan aki a sigui un kurso ofisial, kaminda nan a siña kon pa skapa hende for di e edifisio na un manera mas adekuá i sigur posibel i kon pa duna prome asistensia na eventual víktima, ora ta trata di un kalamidat den Fòrti.
E kursonan tabata den man di un kompania rekonosé dor di ʹNederlands Instituut voor Bedrijfshulpverlening (NIBHV)ʹ. Pa medio di simulashon di diferente tipo di kalamidat, regularmente ta sigui trein e grupo pa asina semper e tim di BHV ta bon prepará pa por aktua bou di tur sirkunstansia posibel.
Na Ulanda BHV ta obligatorio. Na Kòrsou mas i mas kompania i instansia tambe ta mira e nesesidat di prepará pa kualke situashon òf kalamidat. Ta pruebá ku BHV ta hunga un ròl importante di skapa bida di hende pa motíbu ku semper ta trata di hende ku konosé nan edifisio mihó ku kualke dunadó di asistensia profeshonal, manera polis òf brantwer.
Minister di Asuntu General, Eugene Rhuggenaath, a ekspresá su gratitut na e grupo di empleado den su ministerio ku a sigui e kurso. Huntu ku Sekretaris General, Stella van Rijn, i Direktor di Direktorado di Kòntròl di Riesgo i Maneho di kalamidat, Lesley Fer, Minister Rhuggenaath a ekspresá su orguyo i elogio ku su empleadonan ta dispuesto pa yuda nan koleganan durante momentunan di riesgo.
