Publiká riba 06 Mart 2024
MiNEGOSHI Shared & Support Services ta bira un realidat
Willemstad- Djamars 5 di mart 2024, Minister di Desaroyo Ekonómiko, Sr. Ruisandro Cijntje a firma un akuerdo di ehekushon na nòmber di Gobièrnu di Kòrsou ku Sr. John Jacobs i Sra. Kirsten Römer di Stichting Beheer MKB Fondsen pa realisashon di MiNEGOSHI Shared & Support Services. MINEGOSHI Shared & Support Services lo ta un kolaborashon entre Ministerio di Desaroyo Ekonómiko (MEO) i Stichting beheer MKB Fondsen, pa
brinda entre otro konseho i informashon aksesibel i profeshonal riba tereno empresarial pero tambe sosten na empresanan lokal riba tereno di leinan eksistente, asuntunan fiskal i hurídiko i e pèrmitnan nesesario pa por operá un empresa na Kòrsou. MiNEGOSHI Shared & Support Services lo brinda tambe diferente posibilidat pa empresarionan chikí i mediano por nètwèrk i konektá ku tantu potensial kliente komo tambe partners i invershonista. Lo duna e empresario tantu informashon komo sosten riba tereno di finansiamentu pa su negoshi, lo desaroyá i kordiná ‘workshops’, seminario i otro aktividatnan pa yuda stimulá e abilidatnan komersial serka e empresario i tambe lo ofresé ‘coaching’ na empresario nan lokal, duná dor di mentornan kapasitá.
Un di e tareanan prinsipal di MEO ta, pa promové, stimulá i sostené empresanan Mikro, Chikí i Mediano (MKB) na Kòrsou. Apesar di kontratempu i retonan, e sektor aki ketu bai ta keda e wes’i lomba di nos ekonomia lokal, representando no ménos ku 98% di empresanan rònt Kòrsou. Dor di ofresé sosten i guia aksesibel i profeshonal na e sektor aki, nos ta yuda alsa e kapasidat di kresementu di e empresanan i na mes momentu nos ta duna un empuhe tambe na e desaroyo ekonómiko di nos pais.
Pa por duna mihó realisashon na e tarea aki di MEO pa stimulá i sostené empresanan, Minister Cijntje a firma e akuerdo pa ehekushon di e MiNEGOSHI Shared & Support Services pa por brinda mas i mihó guia i posibilidat di kresementu na tantu empresanan eksistente komo esnan ku awor ta bai kuminsá. Stichting Beheer MKB Fondsen, ku lo bai ehekutá e tareanan den e 
MiNEGOSHI Shared & Support Services, ta un entidat ehekutivo ku ta kai bou di Kámara di Komersio di Kòrsou (KVK). E fundashon aki tin eksperensia amplio den maneho i ehekushon di programa i proyektonan dirigí na e sektor di empresanan Mikro, Chikí i Mediano na Kòrsou.
En prinsipio e akuerdo di ehekushon ku a keda firmá tin un durashon di tres (3) aña kual lo kuminsá konta na momentu ku start ku ehekushon di e programa. Por lo ménos un (1) biaha kada kuartal, MEO i Stichting Beheer MKB Fondsen lo bini huntu pa deliberá i evaluá e desaroyonan rondó di MiNEGOSHI Shared & Support Services.
Awor ku ofisialmente e akuerdo di ehekushon ta firmá, MEO huntu ku Stichting Beheer MKB Fondsen lo hasi lansamentu ofisial na públiko di e programa di MiNEGOSHI Shared & Support Services den e simannan benidero. Durante e lansamentu akí, lo duna mas informashon tokante e lokalidat kaminda MiNEGOSHI Shared & Support Services lo ta ubiká físikamente, kon pa drenta den kontakto i un bista mas amplio di tur e diferente servisionan ku e empresario lokal por ferwagt di risibí serka MiNEGOSHI Shared & Support Services.
