Notisia

Willemstad-Minister di Enseñansa, Siensia, Kultura i Deporte sra. Marilyn Alcalá-Wallé a firma un dekreto ku ta regla e èksamen pa e programa final pa e materia di Arte.

Formashon den arte ta dirigí su mes riba e abilidat pa tuma nota, eksperensiá, produsí i reflehá riba arte. E materia di Arte ta kontribuí na e hóben su desaroyo, konsiensia i formashon di identidat propio. E materia di Arte ta partí den un parti teóriko (general) i un parti práktiko (arte visual, baile, drama, músika).  E materia ta para ketu riba e punto di bista general di arte, aserkamentu di reflekshon, arte i religion/formashon spiritual, estétika. Tambe ta duna atenshon na temanan tokante epokánan importante den e.o. abolishon di sklabitut, yegada di Shell, emansipashon, identidat propio i dekolonisashon, partida di Shell, globalisashon, final di Antia Hulandes i aktualidat.

Pa lokual ta trata e parti práktiko tambe e tene kuenta ku términonan final ku bista riba e.o.

• arte visual/baile/drama/músika i komunidat;
• arte visual/baile/drama/músika i desaroyo personal;
• arte visual/baile/drama/músika i e abilidat pa analisá, interpretá i balorá;
• arte visual/baile/drama/músika i ekspreshon, konfigurá i alabes inisiativa empresarial.

Tabatin un temporada ku hóbennan di skol sekundario no por a pasa èksamen mas den e materia di Arte pa motibu ku mester a revisá e materia den su totalidat. Awor ku e programa ta adaptá i sinkronisá, skolnan sekundario por sigui ku e programa nobo i pasa èksamen atrobe pa e materia di Arte.

Riba e foto momento ku Reginald Römer i Susan Larmonie di Ministerio di Enseñansa, Siensia, Kultura i Deporte ta inmortalisá e momento grandi aki huntu ku Minister Marilyn Alcalá-Wallé.

MAS NOTISIA

Ministerio konserní: Enseñansa, Siensia, Kultura & Deporte