Medidanan pa evitá aglomerashon di kònteiner den haf - Informashon tokante Gobièrnu di Kòrsou Bo opinion

Notisia

Medidanan pa evitá aglomerashon di kònteiner den haf

Geplaatst op 26 March 2021 dor di Ministerio Desaroyo Ekonómiko

WILLEMSTAD – Den kuadro di kombatí e vírùs di Corona pa sigui plama, Gobièrnu di Kòrsou a introdusí un toke de keda pa dos siman ku posibilidat pa ekstendé esaki. Esaki entre otro por sòru pa aglomerashon di kònteiner riba tereno di Curaçao Port Services (CPS), ku e konsekuensia ku e tereno den haf dado momentu ta yega su límite.

Pa por prevení ku nos haf ta yena, Ministerio di Desaroyo Ekonómiko konhuntamente ku CPS e yega na un prosedura pa poulatinamente saka kònteinernan ku no ta solamente esnan ku ta pertenesé na e proseso vital, pero tambe kònteinernan ku tin kontenido ku por daña. Pa loke ta e produktonan ku por daña, ta referí na produktonan manera semènt, aparato elektróniko i palu pa menshoná algun.

Meta di medida akí ta pa evitá ku nos haf lo no tin lugá mas pa akapará mas kònteiner, pa evitá ku gastunan di kònteiner ku ta riba werf lo sigui akumulá i pa evitá ku produktonan importá lo daña pasó nan a keda riba werf.

Pa garantisá ku e proseso introdusí ta transparente, Ministerio di Desaroyo Ekonómiko a palabrá ku CPS ku e siguiente prosedura lo keda implementá.

  • Ta laga tur kònteiner ku ta vital pasa dor di e proseso sin ku ta nesesario pa tene kuenta ku e medidanan vigente;
  • Pa produktonan no vital mester tene kuenta ku e siguiente medidanan:
    • Ku CPS konhuntamente ku agentenan lo determiná kua ta e kònteinernan ku tin kontenido ku mester baha for di werf, pa evitá ku esaki ta daña òf forma aglomerashon den haf;
    • E agente ta sòru pa yena e petishon via di un link ku nan a haña di e tim di krísis. Via di e link www.kalamidat.cw/covid19 e agente mester hasi un petishon pa eksonerashon pa hendenan i e kompania kaminda lo mester deskargá e kònteiner. Un kopia di e formulario lo bai pa CPS;
    • E tim di krísis lo evaluá e petishon i duna nan aprobashon pa deskargá e kònteiner;
    • E proseso di evaluashon di parti di e tim di krísis lo dura un máksimo di 3 dia;
    • E kompania ta haña máksimo 2 dia pa deskargá un (1) kònteiner i lo mester pèrkurá ku e kònteiner ta bolbe bèk haf;
    • E trayekto akí lo kontinuá te na momentu ku e lockdown terminá òf gobièrnu disidí otro;
    • CPS lo no kobra “storage” pa e kònteinernan ku ta permanesé riba werf te na momentu ku e lockdown terminá òf gobièrnu disidí otro. 

Ministerio konserní