Medidanan temporal di tráfiko i órden den kuadro di selebrashon 10 di òktober
Publiká riba 07 Òktober 2023
Willemstad – Minister di Hustisia i Minister di Tráfiko, Transporte i Planifikashon Urbano ta anunsiá e siguiente medidanan temporal di tráfiko i orden den kuadro di selebrashon di 10 di òktober 2023.
Konsiderando
- ku riba djadumingu 8 di òktober 2023 ta start ku preparashon, i ku dianan djaluna 9 di òktober i djamars 10 di òktober 2023 lo tuma lugá selebrashon di Reforma di Struktura Estatal di Kòrsou
- ku na interes di órden públiko i tambe di siguridat i libertat den tráfiko ta nesesario pa tuma medidanan adekuá di tráfiko i órden pa por garantisá un desaroyo ordená di e ehersisionan i seremonianan aki;
Teniendo kuenta
Ku e Ordenansa di mantenementu di órden públiko fechá 22 yüli 2015 ku ta kontené reglanan pa mantené órden públiko, trankilidat, seguridat, protekshon di komunidat, i Órden Públiko i Protekshon di Komunidat i e Ordenansa di Tráfiko 2000;
Ta dekretá
Ku riba djadumingu 8, djaluna 9 i tambe djamars 10 di òktober 2023 ta tuma e siguiente medidanan temporal di tráfiko i órden:
- Djadumingu 8 di òktober 2023 entrante 11or di anochi te djamars 10 di òktober 2023 pa 11or di anochi Hendrikplein lo ta sera kompletamente pa tráfiko motorisá. Esaki ta enserá ku lo no pèrmití stashoná vehikulo motorisá na e lugánan pa stashoná na e parti ost di Wilhelminaplein i tambe e área asina yama “Yabi di sentro di suidat”;
- Djaluna 9 di òktober 2023 entrante 3or di atardi te djamars 10 di òktober 2023 pa 3or di marduga i djamars 10 di òktober 2023 entrante 6or di mainta te 11or di anochi no ta pèrmití tráfiko motorisá den direkshon di Parke Wilhelmina, Breedestraat Punda ni tampoko Waterfortstraat for di Hendrikplein na altura di anterior Koko Loko CD-center;
- Djaluna 9 di òktober 2023 entrante 3or di atardi te djamars 10 di òktober 2023 pa 3or di marduga i djamars 10 di òktober 2023 entrante 6or di mainta te 11or di anochi lo no pèrmití tráfiko motorisá pasa dilanti di Plasa di Gobernador direkshon di Handelskade for di Hendrikplein ni tampoko Waterfortstraat. Esaki ta enserá ku lo no pèrmití stashoná vehikulo motorisá na e lugánan pa stashoná den Waterfortstraat ni tampoko dilanti di e anterior Plaza Hotel.
Tur hende mester sigi inmediatamente i puntualmente tur indikashon di òrdu di polis, na bienestar di òrden públiko i di siguridat i libertat den tráfiko.
E medidanan deskribí den e dekreto firmá pa Minister di Hustisia i Minister di Tráfiko, Transporte i Planifikashon Urbano ta na vigor te na momentu ku polis ta haña esaki nesesario na bienestar di órden i siguridat públiko.
