Notisia

 

Minister di Enseñansa, Siensia, Kultura i Deporte (ESKD), sra. Marilyn Alcalá-Wallé a firma memorandum di entendimentu (MOU) ku Wayne State College (WSC). Esaki a sosodé den un ambiente ameno den presensia di: Kònsùl Merikano; sra. M. Hawthorne, presidente di WSC; sra. dr. M. Rames, direktor di maneho di ministerio di ESKD; sra. S. Larmonie, direktor di programanan internashonal & multikultural di WSC; sra. dr. L. Keino huntu ku hóbennan di Kòrsou ku ta bai studia i ya ta studia na Wayne State College, akompañá pa nan mayornan. 

 

Firmamentu di e MOU a tuma lugá den kuadro di e vishon di Gobièrnu pa garantisá estudionan di kalidat i krea oportunidat pa hóbennan studia den region i desaroyá nan mes sin krea debe atronómiko. E akuerdo aki ta enserá ku studiantenan lokal, por sigui ku nan estudio na un tarifa redusí na e instituto, situá na Nebraska. Ministerio di ESKD a yega na un akuerdo kaminda nos studiantenan ta risibí un rebaho di alrededor $5.000,- pa aña eskolar.

 

 

E instituto ta ofresé mas ku 130 estudio riba tereno di e.o. “arts & humanities, business & technology, education & counseling, natural & social sciences”.

Na final di e estudio e studiante ta risibí un diploma di Bachelor òf Master di kalidat haltu ku ta rekonosé globalmente. Por lo demas Wayne State College ta disponé di un campus ku ta konosí pa su reputashon ákademiko, preis faborabel i diversidat di studiantenan lokal i internashonal ku ta forma parti di e “Wayne Community”.

 

Ya tin diferente studiante di Kòrsou ku ta studia na Wayne State College ku prestashon ekselente. Segun nan eksperensia e instituto no ta solamente ofresé un ambiente di estudio dinámiko, pero tambe e ta brinda guia pa nan por desaroyá nan identidat, balor propio, responsabilidat sosial, kual ta prepará nan pa éksito den e komunidat global. 

 

Pa mas informashon por tuma kontakto ku S.S.C na 465-8480 of por bishitá e wèpsait di Wayne State College: www.wsc.edu/international