Bo opinion

Notisia

Mensahe Promé Minister Rhuggenaath den kuadro di rekonosementu Doble R

Geplaatst op 31 January 2020 dor di Ministerio Asuntunan General i Promé Minister

WILLEMSTAD – Aki ta sigui un mensahe di Promé Minister di Kòrsou, sr. Eugene Rhuggenaath, komo reakshon riba e rekonosementu na sr. Rignald Recordino durante selebrashon di e di 50 edishon di Festival di Tumba:

Dia 31 di yanüari 2020, un fecha di gran signifikashon pa Kòrsou, na momentu ku nos ta selebrá e di 50 edishon di Festival di Tumba. Un momento históriko dediká na un gran maestro, Sr. Rignald Silvestre Recordino, kaminda nos komo pueblo ta yama “Doble R” danki pa a deleitá nos mente durante hopi aña ku su tremendo kreashonnan musikal. “Doble R” a sa di kompartí ku nos su edukashon musikal i aportá na enrekesimentu di nos dushi idioma Papiamentu.

Komo mucha i te na edat grandi mi a lanta ta skucha i marchá riba tumbanan di Rignald Recordino, meskos tantísimo otro siudadano. Su kontribushon na nos herensia musikal ta algu ku lo keda marká den nos historia musikal.

Mester gradisí Kreador pa e regalo balioso ku el a duna nos den persona di “Doble R”. Atraves di su kreatividat musikal úniko i su pèn poétiko el a logra traspasá nos frontera i alkansá otro pueblonan. Ta na su lugá pa gradisí “Doble R” pa su tremendo tumbanan ku a inspirá representantenan di tur etnisidat, tur kultura i tur edat riba nos isla hisa man na laira i  manifestá nos mes komo Yu-di-Kòrsou.

Sr. Recordino, risibí mi mas profundo ekspreshon di gratitut i felisitashon na nòmber di nos Pais Kòrsou.

…. I na tur Tumbero, éksito awenochi!

Eugene Rhuggenaath
Promé Minister di Kòrsou

Ministerio konserní