Notisia

WILLEMSTAD – Manera anunsiá den un komunikado di prensa anterior, for di luna di mei di e aña aki, MEO a introdusí un maneho nobo kaminda ta apliká un término uniforme di tres (3) siman pa tur instansia ku mester duna konseho den kuadro di pèrmitnan di horeca. Na momento ku no risibí e konseho denter di e periodo stipulá, MEO lo tuma desishon riba e pèrmit abase di e informashon ku tin disponibel.

For di luna di mei MEO ta trahando aktivamente pa eliminá e retraso den pèrmitnan di horeca. Pa aselerá e proseso pa asina garantisá ku tur komersiante ta disponé di nan pèrmit mas pronto posibel, Minister Middelhof a instalá un término di sinku (5) siman pa otorgá tur pèrmit di horeca atrasá.

Pa medio di e komunikado di prensa aki Minister Middelhof ta informá komunidat ku MEO a términá e periodo di sinku (5) siman ku éksito i a otorgá mayoria pèrmit. Un total di 580 petishon pa pèrmit di horeca a keda atendé. Di e total aki 429 pèrmit a keda otorgá òf ta den fase final pa keda otorgá i 151 petishon ainda ta wantá pa motibu ku esakinan sea falta informashon òf ta petishonnan hasí resientemente (ménos ku 3 siman). Den e simannan benidero MEO lo kompletá e petishonnan aki tambe.

Na momentu ku un pèrmit ta kla, Lokèt di Pèrmit ta manda un email òf ta tuma kontakto telefónikamente ku e kliente pa inform’é esaki. Pa e personanan ku a entregá un petishon pa un pèrmit di horeca i ainda no a risibí un notifikashon di Lokèt di Pèrmit, por tuma kontakto ku nan na emailadres: infovergunningenloket@gobiernu.cw òf na number di telefòn + 599 9 433 – 3123/+ 599 9 433 3127(WhatsApp). Por pasa tambe na ofisina di Lokèt di Pèrmit na Saliña 127, Unit 3-16 Eurobuilding di djaluna pa djaweps entre 8’or pa 3’or òf djabièrnè entre 8’or pa 12’or.

Minister Middelhof ta enfatisá ku mehorashon di servisio di MEO na siudadanonan i empresarionan ta keda su prioridat number un i ta sigui dal stapnan grandi pa yega na un proseso mas efisiente i struktural pa otorgá pèrmitnan ekonómiko.