Publiká riba 16 Yanüari 2023
Willemstad- Konforme lei, Ministerio di Desaroyo Ekonómiko (MEO) ta e ministerio enkargá pa evaluá i otorgá pèrmitnan ekonómiko na Kòrsou. Na luna di Yüli 2022, MEO a informá ku e ministerio ta hasiendo èkstra esfuerso pa a logra aselerá e prosesamentu di pèrmitnan ekonómiko. Mirando bèk riba e kantidat total di pèrmitnan ekonómiko ku a keda prosesá den aña 2022, MEO por bisa ku satisfakshon ku e esfuersonan akí a duna resultado.
En total, MEO a risibí un total di 1.638 petishon pa e diferente pèrmitnan ekonómiko den aña 2022 di kual 1.401 ya a keda prosesá i 237 petishon ta den tratamentu ainda. Huntu ku esaki, e Departamento di Pèrmitnan Ekonómiko di MEO a traha tambe riba un retraso ku tabatin den petishonnan di aña 2021. Ta trata aki di un total di 816 petishon di kua 810 a keda prosesá den e aña tras di lomba. Di e 6 petishonnan di 2021 ku ainda ta pendiente, 5 tabata en espera pa konkluí e maneho di moratorio pa toko i minimarket. Pues awor ku e maneho akí ta kla, por terminá di evaluá i prosesá esakinan tambe.
Aki un skema ku e kantidat di petishon pa kada tipo di pèrmit ekonómiko ku a keda risibí i prosesá na aña 2022 i 2021:
Aparte di e kantidat di pèrmitnan di 2021 i 2022 ya menshoná , MEO a finalisá tambe un kantidat di 40 petishon di pèrmitnan di HORECA di 2022 i 108 petishon di HORECA datá mas bieu ku e 2 añanan akí. Esaki ta debí ku MEO a risibí e enkargo pa atendé ku pèrmitnan di horeca na aña 2017 i na e momentu akí ya tabata tin un retraso. Huntu ku e petishonnan regular ku ta drenta diariamente via Lokèt di Pèrmit, e Departamento di Pèrmit Ekonómiko di MEO ta traha pa prosesá esakinan tambe.
Pues huntu ku esakinan, si kontá e total di petishonnan di pèrmit ekonómiko ku a keda finalisá na aña 2022, e Departamento di Pèrmit Ekonómiko a atendé un total di 2.359 petishon pa pèrmit kual berdaderamente ta mustra ku e ministerio ta riba e bon kaminda.
Mester bisa, ku pèrmitnan di HORECA tambe ta kai bou di e kategoria di pèrmitnan ekonómiko, sinembargo e proseso pa evaluá e petishonnan akí ta dependé adishonalmente di konseho di otro instansianan manera Brandweer, ROP, G&Gz i UBW lokual por stagna e término di tratamentu pa kada petishon.
Den algun kaso ora ta trata pèrmitnan di HORECA, e kliente ta risibí tambe un konseho pa hasi sierto adaptashon na su establesimentu i e adaptashonnan akí no ta keda hasí pa e petishon por sigui kana.
Resientemente MEO a kuminsá ku un trayekto pa yega na un maneho pa HORECA di manera ku por hasi e otrogamentu di e pèrmit aki mas efisiente. Na momentu ku e maneho ta kla lo adaptá e lei aktual.
