MEO i CPS a yega na solushon pa rebahá multitut di konteiner den haf - Informashon tokante Gobièrnu di Kòrsou Bo opinion

Notisia

MEO i CPS a yega na solushon pa rebahá multitut di konteiner den haf

Geplaatst op 16 April 2020 dor di Ministerio Desaroyo Ekonómiko

Komo konsekuensia di e Toke de Keda ku a keda instituí dor di Gobièrnu di Kòrsou dia 28 di mart último, mester a adaptá trabounan den nos haf tambe pa asina kumpli debídamente ku e reglanan stipulá. No por a laga tur kompania bin buska nan produktonan si eseinan no tabata vital. Esaki a trese kuné un sierto retraso den trabounan den haf di konteiner, lokual a okashoná ku na e momentunan aki tin un akumulashon grandi di kònteiner riba tereno di Curacao Ports Services (CPS). 

Djaluna 12 di aprel e medidanan di protekshon tumá dor di Gobièrnu a keda prolongá ku 2 siman i mirando esaki Minister di Desaroyo Ekonómiko, Sra Giselle Mc William, a tuma pasonan nesesario pa asina yega na un solushon pa evitá kongestion di kònteinernan den haf. Minister Mc William a reuní ku Curacao Ports Services (CPS) pa asina yega na un prosedura pa tiki tiki kuminsá saka kònteinernan, ku aktualmente ta okashoná ku tereno den haf ta yegando su límite máksimo. 

E prosedura pa duna pèrmit pa saka mas kònteiner for di haf ainda lo no inkluí tur kònteiner, pero si ta amplia loke prome tabata posibel. Si promé solamente kònteinernan ku ta kontené produktonan vital por a sali, awor ta inkluí tambe kònteinernan ku ta kontené produkto i/òf merkansia ku fásilmente por daña. Ehèmpel di produkto i/òf merkansia ku por ta kontené den e kònteinernan aki ta semènt, aparatonan elektróniko i palu.

E prosedura adaptá aki a keda stipulá ku e meta pa yuda prevení ku nos haf no tin lugá pa akapará mas kònteiner, evitá ku gastu di duana pa kònteinernan aktualmente riba werf ta sigui akumulá i tambe ta hasi e posibilidat ménos grandi, ku produktonan importá ta daña komo konsekuensia ku nan a keda muchu largu den kònteiner riba werf.

Pa por garantisá ku e proseso aki ta kana den forma transparente, sra Mc William a hasi e siguiente palabrashonnan ku gerensia di CPS;

  • Konhuntamente ku outoridatnan kompetente, CPS lo determiná kua ta e kònteinernan ku mester baha for di werf pa evitá ku tin kontenido ku por daña. 
  • E agensia ta yena un petishon via di e website kalamidat.cw (ontheffingsaanvraag) pa e persona(nan) i kompania, kaminda mester deskargá e kònteiner. (Un kopia di e petishon aki ta bai pa CPS);
  • E tim di Krísis lo evaluá e petishon i si esaki ta kumpli ku tur rekisito ta duna aprobashon pa deskargá e kònteiner;
  • E proseso di evaluashon di e petishon ta dura máksimo 3 dia;
  • E kompania ta haña máksimo 3 dia pa deskarga un (1) kònteiner basá riba e kantidat di hende i e kontenido di e kònteiner;
  • E trayekto aki ta kontinuá te na momentu ku Gobièrnu kita e medidanan vigente di Toke de Keda;

Aparte di esaki, minister di Desaroyo Ekonómiko, riba inisiativa di CPS, a tuma e desishon pa no kobra gastu di depósito (opslag) ni tampoko di kònteiner na e importadonan durante di e periodo aki. E desishon aki tambe lo ta vigente te na momentu ku Gobièrnu retirá e medida aktual den kuadro di Covid 19. 

Si akaso, despues di e proseso aki, ainda tin hopi kònteiner ku mester baha for di e tereno di CPS, lo sòru konhuntamente ku CPS pa ekstendé un periodo di grasia.

Ta evaluá e trayekto aki kada siman i lo adaptá esaki debidamente kaminda ta nesesario. Ta eksistí e posibilidat ku gradualmente por pasa pa otro kategorianan di produkto ku tin mag di sali, na momentu ku logra saka tur loke ta esensial i esnan ku por daña for di riba terenonan di werf.

Ministerio konserní