Publiká riba 06 Yüni 2023
WILLEMSTAD – Dia 26 di mei último a tuma lugá firmamentu di un akuerdo di koperashon entre Ministerio pa Desaroyo Ekonómiko (MEO) i e Federashon Koperativanan Uní di Produkshon (FKUP).
FKUP a keda fundá na aña 2019 i un di su promé akshonnan tabata pa sera konosí di forma ofisial ku MEO. Un di MEO su tareanan komo ministerio ta pa stimulá desaroyo di koperativa na Kòrsou.
For di 2019 MEO ta duna koperashon i sosten na FKUP den diferente forma. Asina por menshoná ku na 2020 durante di pandemia di COVID-19, MEO a organisá un kurso di koperativa di forma ku e direktiva di FKUP por a alsa nan konosementu. Pa esaki MEO a haña koperashon di un dosente versá riba tereno di koperativa for di Paraguay, sr. Florencio Nuñez, ku a duna e kurso virtual 2 biaha pa siman durante un periodo di 12 siman.
Riba 1 di yüli 2021, FKUP i MEO huntu a organisá un webinar den kuadro di e di 27 edishon di selebrashon di dia Internashonal di Kooperativa. E tema di e aña ei tabata “Rekonstruí mihó huntu”.
Resientemente FKUP i Minister Cijntje tabata di bishita tambe na Rio Hacha, Colombia den kuadro di produkshon i importashon di fruta i bèrdura. Esaki mester bai yuda pa garantisá ku pueblo por haña fruta i bèrdura na un preis pagabel.
E akuerdo di koperashon akí ta fortifiká e lasonan i trabounan ku FKUP i MEO a bini ta hasi huntu i ta enfoká riba stimulá i fasilitá e desaroyo di mas koperativa, spesífikamente di produkshon i servisio na Kòrsou.
