Publiká riba 20 Febrüari 2024
Un inisiativa pa sostené i empoderá empresarionan den e sektor di Agrikultura na Kòrsou
Willemstad– Djamars 20 di febrüari último, Minister di Desaroyo Ekonómiko (MEO), sr. Ruisandro Cijntje, tabatin e honor pa ofisialisá inisiashon di Agrifonds Ķòrsou huntu ku sra. Raiska Herrera,-‘Branchmanager’ di Qredits Kòrsou. E seremonia di apertura aki a tuma lugá den un esfera ameno ku presensia di entre otro koleganan minister, stakeholdernan di e sektor di agrikultura, miembronan di e tim di MiNEGOSHI, e grupo di trabou di Food Security, instansianan di interes den sektor empresarial i naturalmente represensentantenan di Qredits inkluyendo futuro coachnan di Agri Business Academy.
Tantu Minister Cijntje komo sra. Herrera a hiba palabra na okashon di lansamentu di e programa Agrifonds. Di akuerdo ku Minister Cijntje, e invershon di MEO den e sektor di agrikultura ta parti di e vishon ku e ministerio tin pa desaroyá e sektor akí pa e por proveé sufisiente alimento saludabel i di kalidat haltu pa e komunidat lokal i pa kombertí esaki den un pilar ekonómiko duradero pa nos pais.
E programa Agrifonds, presentá pa Qredits, ta duna finansiamentu pa reforsá empresarionan lokal den e sektor di agrikultura pa por produsí i suministrá kuminda di kalidat haltu pa nos komunidat. Esaki sin lugá na duda, ta kuadra totalmente den kuadro di e vishon di MEO i ta reflehá den e dokumento di maneho pa desaroyo di e sektor di agrikultura titulá, “Barika yen, Kòrsou Kontentu”!
Aparte di brinda empresarionan i futuro empresarionan den e sektor di agrikultura oportunidat di fiansa na un interes di 2%, un di e ophetivonan prinsipal di e programa aki ta pa empoderá i fasilitá empresarionan via di e Agri Business Academy ku konosementu i hèrmèntnan spesífiko pa loke ta trata agrikultura, di forma ku nan por krea nan propio plan di negoshi i plan finansiero pa kuminsá òf sigui manehá nan negoshi ku éksito. Esaki lo yuda empresarionan i futuro empresarionan lokal den e sektor di agrikultura pa logra nan metanan i lo stimulá e kadena di kuminda na Kòrsou. En total, un máksimo di 36 empresario lo por hasi uso di e programa aki di formashon spesífikamente pa e sektor di agrikultura den 2024, kual lo dura 14 siman . Den e kolaborashon aki entre MEO i Qredits, MEO ta sòru pa un supsidio na Qredits di moda ku esaki por ofresé finansiamentu na un interes mas abou (2%) na empresarionan agrario. Tambe MEO ta finansiá e asina yamá ‘Agri Business Academy’.
Minister Cijntje a indiká tambe ku e ta kere ku e programa di Agrifonds lo sirbi komo estímulo pa mas hóben mira e potensial i skohe pa sea inisiá nan mes negoshi òf pa laborá den e sektor akí, ku ta di gran vitalidat pa nos komunidat.
Nos mes por!
Durante di su disertashon minister Cijntje a suprayá e echo ku MEO ta kere firmemente den e kapasidat ku nos pais tin pa pèrkurá pa seguridat di kuminda pa nos mes hendenan i te asta pa eksportá, i ku e sektor aki tin e potensial pa bira otro pilar ekonómiko. Pa e motibu ei MEO ta enfoká riba kresementu di agrikultura i krio di bestia, i ta sostené programanan ku ta kontribuí na esaki.
Estímulo pa instansianan finansiero lokal
Aportando na e proyekto akí i kolaborando ku Qredits Kòrsou, MEO ta spera ku e inisiativa di Agrifonds pa ofresé fiansanan te ku un máksimo di 100.000 florin na un interes bentahoso na empresarionan eksistente i tambe empresarionan ku lo inisiá nan kompania próksimamente den e sektor di agrikultura, lo stimulá otro instansianan finansiero pa sigui krea i ofresé fondonan bèrdè, spesialmente na empresarionan ku ta deseá pa invertí den e sektor akí.
Rekonosementu na Qredits i MEO
Minister Cijntje a dediká palabranan di elogio na Qredits Hulanda i Qredits Kòrsou, ku por sierto a selebrá nan di 5 aniversario na aprel 2023. El a rekonosé e kontribushon balioso ku e institutonan aki a bini ta aportá na desaroyo di e mundu empresarial na Kòrsou i konsekuentemente na nos ekonomia. Den mesun rosea Minister Cijntje a duna su palabra ku e i su ministerio lo sigui duna nan sosten meskos ku nan a hasi for di inisio di Qredits Kòrsou na bienestar di nos empresarionan lokal i tambe di nos komunidat. Tambe Minister Cijntje a gradisí su koleganan di MEO i indiká ku e ta sumamente orguyoso di nan dedikashon i esfuersonan den realisashon di Agrifonds.
Disponibilidat di Agrifonds
Unabes a lansa e programa ofisialmente, interesadonan ya por bishitá e siguiente página di e website di Qredits Curaçao, https://bit.ly/AgriBusinessCuracao , pa mas informashon tokante e Agri Business Academy i e finansiamentu di Agrifonds ku ta disponibel. Tambe lo por registrá i inskribí via di e página akí.
