MEO ku sinku evento pa yuda empresarionan krese i bira mas kompetitivo - Informashon tokante Gobièrnu di Kòrsou

Notisia

Desaroyo Ekonómiko
 

MEO ku sinku evento pa yuda empresarionan krese i bira mas kompetitivo

Publiká riba 29 Òktober 2026

WILLEMSTAD – Den kuadro di Global Entrepreneurship Week 2026, Ministerio di Desaroyo Ekonómiko (MEO), bou di guia di Minister di Desaroyo Ekonómiko, Dr. Roderick Middelhof, ta organisá sinku evento entre 9 i 25 di novèmber. E programa ta forma parti di e kompromiso di minister pa fortalesé e ambiente empresarial di Kòrsou. E ta dirigí na empresarionan lokal, kompanianan chikí i mediano i organisashonnan ku ke traha mas efisiente, amplia nan merkado i prepará pa futuro.

MEO ta organisá e eventonan via e programa di Landspakket pa redusí trámitenan i gastunan di hasi negoshi, huntu ku Mi NEGOSHI Shared & Support Services. Kada evento ta enfoká riba un tema práktiko: sostenibilidat, benta, protekshon di entrada, hasi negoshi ku Gobièrnu i konektá empresanan ku tin un reto ku empresanan lokal ku por ofresé un solushon.

 

9 di novèmber – Oumentá bo kompetitividat ku strategianan internashonal di sostenibilidat ESG

3:00–5:00 PM | Amazia, edifisio di MEO | Ingles

Práktikanan relashoná ku medioambiente, responsabilidat sosial i bon maneho di empresa, konosí komo ESG, ta bira kada bes mas importante. Esaki ta konta spesialmente pa empresanan ku ta forma parti di kadenanan internashonal di produkshon i komèrsio. Durante e workshop práktiko, partisipantenan lo mira kon protekshon di medioambiente, sosten di personal i komunidat, i kumplimentu ku lei por yuda un empresa redusí gastu i riesgo, krea oportunidat nobo i fortalesé su posishon den merkado. Danielle Cohen Henriquez, MBA, lo dirigí e seshon. E ta un spesialista lokal den sostenibilidat i desaroyo di negoshi ku eksperensia internashonal amplio. E ta tambe Coach pa Futuro di MEO.

 

16 di novèmber – Kon pa yega na bo promé 10.000 pa luna

9:00 AM–1:00 PM | Elevation Rooftop Curaçao | Papiamentu

Hopi empresario chikí ta logra kuminsá nan negoshi, pero despues ta yega na un punto kaminda nan benta no ta krese mas. E evento aki lo ofresé método i strategianan práktiko pa mehorá benta, atraé mas kliente i traha riba kresementu pa término largu. E programa ta kombiná un workshop, kontenido di motivashon, brùnch i oportunidat pa konektá ku otro empresario. E fasilitadónan ta: Sigmara Gijsbertha, business coach i propietario di Sigmara Gijsbertha Academy i Irvinia Wout-Daantje, spesialista den salú di kabei i propietario di Nina Hair. Kosto di partisipashon: XCG 125 pa persona.

 

17 di novèmber – Protekshon di entrada pa empresario

3:00–5:00 PM | Amazia Restaurant | Papiamentu

Entrada di un empresario por kambia pa motibu di situashonnan inesperá, manera un problema di salú, kambio den ekonomia òf kambio den merkado. Esaki por pone tantu kontinuidat di e empresa komo stabilidat finansiero di e empresario i su famia bou di preshon. Durante e seshon, doñonan di kompanianan chikí i mediano lo risibí informashon i konseho práktiko pa protehá nan entrada i prepará pa riesgonan finansiero. E fasilitadó ta Rusheedia Maduro, Financial Protection Advisor. Entrada ta grátis.

 

19 di novèmber – Hasi negoshi ku Gobièrnu

2:00–5:00 PM | Amazia, edifisio di MEO

Kompra i kontratashon di Gobièrnu por ofresé oportunidat na empresanan lokal. Sin embargo, hopi empresario no konosé e plannan di kompra di Gobièrnu, e proseduranan pa partisipá ni e dokumentonan nesesario. E workshop lo splika e normanan di kalidat, kon pa partisipá den un prosedura di oferta, e reglanan di integridat, dokumentonan pa pago i maneho di entrada i salida di plaka. E fasilitadó prinsipal ta Royston Paulina MSc., Direktor Finansiero di MEO.

 

25 di novèmber – BIZ2BIZ: Konektá empresanan ku solushonnan lokal

6:00–9:00 PM | Amazia, edifisio di MEO, Pletterijweg

Hopi empresa tin retonan ku por tin un solushon lokal kaba p’e. Sin embargo, e empresa ku tin e reto i e empresa ku tin e solushon no semper konosé otro. BIZ2BIZ ta konektá empresa, organisashon di Gobièrnu, fundashon i asosashon ku proveedónan lokal di produkto i servisio. Empresanan ku ta ofresé un produkto òf servisio nobo òf ménos konosí por duna un presentashon kortiku, konosí komo un elevator pitch. Organisashonnan ku tin un reto ta invitá tambe pa presentá nan nesesidat. E solushonnan por yuda empresanan redusí gastu, spar tempu, mehorá kalidat, kumpli ku lei, oumentá ganashi òf drenta merkadonan internashonal. Empresanan for di komèrsio, konstrukshon, turismo, industria, utilidat, transporte, servisio profeshonal i otro sektornan ta bon biní. MEO ta organisá BIZ2BIZ huntu ku OCBN – One Caribbean Business Network i Curaçao Tech Meetups.

 

Mehorá e ambiente empresarial di Kòrsou

Ku e sinku eventonan aki, MEO ke duna empresarionan konosementu, kontakto i instrumento ku nan por usa direktamente den nan negoshi. E programa ta sostené e metanan di Landspakket E.6.3 pa redusí trámitenan administrativo, baha e gastunan di hasi negoshi i mehorá e ambiente empresarial na Kòrsou.

Pa registrashon i mas informashon, sigui e páginanan ofisial di Ministerio di Desaroyo Ekonómiko i Mi NEGOSHI riba Facebook i Instagram, òf yama MEO na +599 9 462 1444.