MEO, Qredits i Korpodeko ta bolbe brinda fasilidat di krédito transitorio pa empresanan mikro, chikí i mediano - Informashon tokante Gobièrnu di Kòrsou Bo opinion

Notisia

MEO, Qredits i Korpodeko ta bolbe brinda fasilidat di krédito transitorio pa empresanan mikro, chikí i mediano

Geplaatst op 02 February 2021 dor di Ministerio Desaroyo Ekonómiko

WILLEMSTAD- Entrante djárason 3 di febrüari, Ministerio di Desaroyo Ekonómiko (MEO) pa medio di MiNEGOSHI i konhuntamente ku Qredits i Korpodeko, lo bolbe habri e portal pa brinda fasilidat di krédito transitorio na empresarionan mikro, chikí i mediano. Esaki tantu den sektor turístiko (horeca i sektor di transporte), pero tambe otro sektornan ku ta enkontrá difikultat finansiero komo konsekuensia di COVID-19.

E krédito transitorio akí tin komo meta pa yuda e empresario mikro, chikí òf mediano supli den e gastunan operashonal di su empresa i di e forma akí yuda e empresario stabilisá despues di Covid-19.

Den e proseso akí tantu Qredits komo Korpodeko ta sigui traha independientemente for di Gobièrnu i kada un ta apliká nan propio proseso di krédito.  

Pa por bini na remarke, e empresa entre otro mester ta establesé na Kòrsou i registrá na Kámara di Komèrsio promé ku 16 di òktober 2019. Tambe e empresa mester pas den e definishon di Gobièrnu pa loke ta trata empresanan mikro, chikí i mediano. Pues kompanianan ku ta kai bou di e kategoria akí ta konsistí di mínimo 1 te ku máksimo 50 empleado i ta krea un ingreso anual di máksimo 5 mion florin. Tuma nota di demas kondishon i rekisitunan pa por apliká pa e fasilidat di krédito transitorio akí riba www.fondodisosten.org.

E empresario ku ta bini na remarke, ta risibí un krédito transitorio eksklusivo (un biaha so) serka Qredits òf Korpodeko, ku kondishonnan di pago adaptá riba término largu (un periodo di grasia di máksimo 12 luna) i (temporalmente) un porsentahe di interes sumamente abou (2%). Si ta nesesario, e empresario lo risibí tambe guia i konseho pa asina sigurá ku e empresa por manehá e krédito debidamente i yuda reforsá e empresa su kapasidat pa na final kumpli tambe ku su deber di pago bèk.

E formulario pa hasi petishon pa e fasilidat di krédito transitorio akí lo ta habrí entrante djárason 3 di febrüari pa 8’or di anochi riba fondodisosten.org. Aplikashon lo ta posibel te ku un próksimo aviso.

Si akaso tin kualke pregunta adishonal tokante e fasilidat di krédito transitorio akí, por tuma kontakto ku nos via kredito@fondodisosten.org.

Ministerio konserní