MEO ta aselerando e prosesamentu di pèrmitnan ekonómiko - Informashon tokante Gobièrnu di Kòrsou

Notisia

Ministerio konserní Desaroyo Ekonómiko
 

MEO ta aselerando e prosesamentu di pèrmitnan ekonómiko

Publiká riba 01 Yüli 2022

Willemstad-  Den e esfuersonan di Ministerio di Desaroyo Ekonómiko (MEO)  pa logra aselerá e prosesamentu di pèrmitnan ekonómiko, e tim di e Departamentu di Pèrmitnan Ekonómiko den e ministerio a logra prosesá un total di 439 pèrmit ku tabata pendiente den e luna tras di lomba.
Bou di pèrmitnan ekonómiko ta komprondé entre otro pèrmit di establesimentu (vestigingsvergunning), e diferente pèrmitnan di HORECA, pèrmit di standplaats i vènt, pèrmit pa gerensia (directievergunning) i pèrmit di E-Zone.

Pa lei, Minister di Desaroyo Ekonómiko ta esun responsabel pa otorgá pèrmitnan ekonómiko na Kòrsou. Den luna di yüni tras di lomba , e tim di e Departamentu di Pèrmitnan Ekonómiko a hinka èkstra esfuerso pa por logra finalisá mas tantu petishon di pèrmit posibel. E Departamentu di Pèrmitnan Ekonómiko akí ta esnan ku diariamente ta evaluá i tuma desishon riba petishonnan di pèrmit ekonómiko ku keda risibí via Lokèt di Pèrmit.

Den e periodo benidero, MEO su tim ta bai kontinuá ku e mesun dedikashon i entrega pa pronto logra finalisá mayoria di e petishonnan pendiente. Den esaki mester tene debido kuenta ku, pa por prosesá sierto di e petishonnan pa pèrmit ekonómiko, MEO ta dependé adishonalmente di konseho di otro instansianan manera Brandweer, ROP, G&Gz i UBW.

MEO ta hasi alabes un apelashon na tur persona ku a risibí notifikashon ku su pèrmit a wòrdu prosesá i ku tin un desishon, pa akudí na Lokèt di Pèrmit mas pronto posibel pa por tuma esaki. Pa mas informashon tokante status di pèrmit por tuma kontakto libremente ku Lokèt di Pèrmit na number di telefòn 434-1692 òf por manda un mail na afgifte.vergunningenloket@gobiernu.cw.