Publiká riba 12 Mei 2020
WILLEMSTAD- Konstrukshon di un ekonomia fuerte i stabil lo ta un responsabilidat di nos tur; no solamente di Gobièrnu sino tambe e ròl di kada siudadano den esaki lo ta indispensabel. Minister di Desaroyo Ekonómiko, sra. Giselle Mc William huntu ku e team di Ministerio di Desaroyo Ekonómiko (MEO) ya a bin ta uni esfuersonan ku diferente stakeholder pa asina deliberá riba re-stabilisashon di un ekonomia 2.0 pa nos pais. Sinembargo den e deliberashonnan aki, inklusividat di sugerensianan di nos pueblo den su totalidat lo ta di sumo importansia pa asina e vishon pa ekonomia 2.0 aki por dispone di tur komponente nesesario pa éksito.
Den e siman tras di lomba, minister di Desaroyo Ekonómiko, sra. Giselle Mc William huntu ku e tim di MEO a anunsiá inisio di seshonnan di diálogo i brainstorming virtual riba desaroyo di nos ekonomia den e asina yamá ‘normal nobo’ ku nos pais a konosé.
Promé ku nos pais a keda konfrontá ku efektonan di COVID-19, ya nos ekonomia tabata konfrontá su retonan i tabata inevitabel ku nos lo a bin na sinti e efektonan direkto di esaki den nos plan i desaroyonan ekonómiko ku ya nos a bin ta traha riba dje anteriormente. Apesar di tur esaki, minister Mc William ta keda reiterá ku mirando e desaroyonan mundial den e temporada aki, lo no ta un opshon pa Kòrsou bai bèk na e loke nos tabata ántes. Nos pais mester uza e normal nobo aki, komo un medio pa konhuntamente logra konstruí algu mihó di loke nos tabata tin promé. Den e plan pa Kòrsou 2.0 nos lo ke yega na un ekonomia stabil, fleksibel, duradero i inovativo. Un ekonomia ku por adaptá na kambionan mundial i sigui krese. Pa por logra esaki, aspektonan manera teknologia i inovashon lo bai ta motornan vital ku mester keda inkorporá. Aktividatnan ku ta supstituí importashon mester haña prioridat. Ekonomia Sirkular, eksportashon i turismo kompañá ku elementonan inovativo i insentivonan atraktivo tambe ta temanan sin mas ku lo mester amplia riba dje.
Huntu ku diferente otro partner i stakeholder den e sektor, nos ministerio ya a bin ta tene seshonnan virtual pa asina deliberá i yega na un forma di funshoná muchu mas optimal pa nos pais riba e diferente aspektonan aki. 
Sinembargo ekonomia di un pais ta algu ku henter e pueblo lo mester karga di moda ku esaki por krese. Pues nos ta konvensí ku den konstrukshon di e vishon aki, partisipashon i inklushon di un i tur ta e yabi pa alkansá e éksito ku nos ta deseá. Netamente pa e motibu aki a habri e posibilidat pa tur siudadano ku tin teps balioso i o sugerensia ku nos ekipo lo por uza pa rekonstruí nos ekonomia 2.0 por kompartí esaki ku nos. Tur teps i sugerensia pa ku nos ekonomia 2.0 por keda kompartí ku nos mandando un whatsapp na e number
+599 9 528-2543. Tuma bon nota ku e number aki ta solamente pa sugerensia i tep den kuadro di ekonomia 2.0 i no pa otro temanan.
