Publiká riba 14 Yanüari 2020
WILLEMSTAD- Djaluna dia 13 di yanüari último, Ministerio di Desaroyo Ekonómiko (MEO) ofisialmente a risibí sr. Xavier Prens den su posishon komo sekretario general nobo pa e ministerio. Komo Sekretario General (SG), sr. Prens entre otro lo ta enkargá ku e maneho operashonal di e ministerio den su totalidat.
Despues di un trayekto intensivo di rekrutamentu i selekshon, sr. Prens a demostrá di ta e kandidato korekto pa por tuma rienda di e ministerio i sigui manehá esaki den e direkshon pa kresementu ekonómiko. 
Ministerio di Desaroyo Ekonómiko (MEO) tin komo mishon prinsipal, pa duna direkshon na un desaroyo ekonómiko duradero pa Kòrsou. Ku esaki e ministerio lo ke yega na promové un kalidat di bida haltu i próspero pa tur habitante di Kòrsou. Diariamente e diferente sektornan den e ministerio ta traha na realisashon di e mishon aki dor di efektivamente antisipá riba desaroyonan sosial i internashonal, duna servisio optimal i hiba un strategia profundo. E ministerio ta responsabel entre otro pa sostené e mundu di negoshi lokal, saka pèrmitnan ekonómiko nesesario promové inovashon i eksportashon mei mei di nos empresarionan i sostené kontaktonan internashonal pa asina atraé invershonistanan ku por sòru pa mas kupo di trabou. Aparte di esaki, e ministerio ta enkargá tambe ku e kartera di turismo kual a bin ta demonstrá di ta un di e pilarnan esensial pa ekonomia di nos pais.
Mirando e retonan ekonómiko i finansiero ku nos pais ta konfrontá aktualmente, un ministerio di tal embergadura mester ta dispone di un kapitan ku e vishon i e hèrmèntnan nesesario pa por tuma e guia i maneho pa asina e ministerio por alkansá su mishon. Huntu ku esfuersonan di e ministerio, e gabinete aktual a bin hasiendo diferente esfuerso pa duna un boost na e desaroyo ekonómiko di Kòrsou i e ròl nobo di sr. Prens komo sekretario general di MEO lo ta prominente den esaki.
sr. Prens den su ofisina nobo komo sekretario general di MEO
Promé di a keda nombra komo sekretario general nobo pa Ministerio di Desaroyo Ekonómiko, sr. Prens tabata fungi for di 2013 komo minister plenipotensiario di Kòrsou na Washington. Anteriormente sr. Prens a konosé un trayektoria amplio den servisio pa nos pais komo entre otro; representashon pa Antia den embahada di Port au Spain na Trinidad, kònsùl di Kòrsou na Miami i tambe kolaborador di maneho na Directie Buitenlandse Betrekkingen(DBB).
E reto nobo komo sekretario general di MEO sin mas ta unu konsiderabel. Pero sr. Prens ta duna di konosé di ta kla i motivá pa kontribuí ku su eksperensia i konosementu na realisashon di un metamorfósis ekonómiko pa nos dushi isla.
