Publiká riba 13 Desèmber 2018
Servisio di Atmishon ta partisipá ku entrante 1 di yanüari 2019 tur estranhero ku ke hasi petishon pa pèrmit di estadia ku meta laboral, konforme artíkulo 5 insiso 3 di Landsverordening Arbeid Vreemdelingen (LAV) mester entregá un pèrmit di trabou huntu ku su petishon. E pèrmit di trabou ta fungi komo prueba di sufisiente entrada finansiero. Sin e dokumento aki e petishon ta inkompletu i Servisio di Atmishon no tuma e petishon.
Atíkulo 3 di Landsverordening Arbeid Vreemdelingen i artíkulo 10 di e Landsbesluit Arbeid Vreemdelingen ta indiká e kasonan den kua e doño di trabou no tin mester di hasi un petishon pa un pèrmit di trabou na Ministerio di Desaroyo Sosial, Labor i Bienestar pa e estranhero ku ta traha p’e. Pa tur sobrá kaso, e estranhero ku ta entregá un petishon pa pèrmit di estadia temporal ku meta laboral, mester entregá e pèrmit di trabou huntu ku su petishon.
Pa e estranhero ku tin un pèrmit di estadia temporal di kua a keda apuntá komo independiente (zelfstandige) pero ku ta ehersé trabou kontra pago, konforme artíkulo 3 bou di lèter d di LAV, e dunadó di trabou mester tin e pèrmit di trabou nesesario.
Pa keda na altura di tur informashon, por bishitá nos página di Facebook Toelatingsorganisatie Curaçao-Inmigrashon Kòrsou òf website di gobièrnu www.gobiernu.cw. Por tuma kontakto ku nos na telefòn 733-2000 òf manda un email na info@immigrationcur.org.
