Notisia

WILLEMSTAD – Ministerio di Enseñansa, Siensia, Kultura i Deporte ta anunsiá ku na Sentro di Ekspertisia pa Prueba i Èksamen / Expertisecentrum voor Toetsen & Examens (ETE) mester hasi petishon únikamente ‘online’ pa inskribí pa Prueba di Naturalisashon. E petishon mester keda hasí entre 10 di yanüari te ku djabièrnè 14 di yanüari 2022 via di un formulario digital.

ETE ta informá na tur persona ku ke partisipá na e próksimo Prueba di Naturalisashon (periodo 1,  Parti 1, 2, 3 na mart/aprel 2022), ku nan mester hasi un petishon pa por partisipá na e èksamen ariba menshoná. Di djaluna 10 di yanüari te ku djabièrnè 14 di yanüari 2022, por hasi un petishon pa inskribí únikamente pa medio di un formulario ‘online’. E formulario ‘online’ ta aksesibel via di e página di wèp www.ete.cw na e menú ‘Naturalisatietoets – ‘Aanmelden’. Mester yena e formulario kompletu i tambe manda e dokumentunan rekerí via di e formulario ‘online’, ku ta un identifikashon bálido (sédula òf pasport) i pèrmit di estadia bálido.

Pa mas informashon por ‘download’ e aviso: AVISO – INSKRIPSHON Prueba di Naturalisashon ETE

MAS NOTISIA

Ministerio konserní: Enseñansa, Siensia, Kultura & Deporte