Notisia

Mester pidi eksonerashon pa biaha ku yu promé ku 5 yüli 2019

Geplaatst op 23 June 2019 dor di Ministerio Enseñansa, Siensia, Kultura & Deporte

Willemstad – Nos ta yegando na final di aña eskolar 2018-2019 i Ministerio di Enseñansa, Siensia, Kultura & Deporte, pero tambe Ministerio Hustisia ta konfrontá diferente kaso kaminda mayornan kier biaha pa eksterior ku yunan menor di edat ku ainda ta kai bou di e lei di Enseñansa Obligatorio, sin hasi petishon pa eksonerashon di lei pa biaha pa e periodo bou di ora di skol.

Ministerio di Enseñansa ta enfatisá ku tur mayor mester hasi petishon pa eksonerashon di lei di Enseñansa Obligatorio, e asina yamá “Vrijstelling”, pa por biaha durante periodo di skol. Mester kumpli ku lei, pa evitá ku akseso pa biaha ta keda ningá.  Ministerio di Enseñansa ta informá un biaha mas ku e último dia di skol di aña eskolar 2018-2019 ta djabièrnè, dia 5 di yüli próksimo. E aña aki periodo di vakashon grandi ta kore di djaluna, 8 di yüli te ku djarason, 14 di ougùstùs. E promé dia di skol di aña eskolar 2019-2020 ta riba 15 di ougùstùs 2019.

Mayornan ku kier biaha pa eksterior durante dianan di skol ta obligá na hasi petishon pa eksonerashon di lei di Enseñansa Obligatorio konforme artikulo 2 i 5.  Pa hasi petishon pa eksonerashon, mayor mester di pèrmit/aprobashon di skol pa biaha den e periodo menshoná, i ku esaki akompañá pa identifikashon di mayor, akto di nasementu di e yu i troubuk, presentá na departamentu di Leerplicht, na Schottegatweg Oost number 10, pa hasi e petishon pa eksonerashon.

Tene kuenta ku por dura algun dia pa prosesá e petishon. Pa kualkier informashon por tuma kontakto ku e Organisashon pa Ehekushon di Enseñansa & Siensia na +599 9 732 4324.

—

Sr. Wladimir Kleinmoedig

Direktor di Sektor di Enseñansa & Siensia

Ministerio di Enseñansa, Siensia, Kultura & Deporte

Ministerio konserní

• Enseñansa, Siensia, Kultura & Deporte