Notisia

WILLEMSTAD – Ministerio di Desaroyo Ekonómiko (MEO) ta hasi un yamada na tur kompania/persona ku ke bende oliebòl, kèrstboom, vürwèrk òf ártikulonan di Pasku kantu òf riba kaminda públiko òf ku ke tene “kerstmarkt” durante periodo di fin di aña 2023, pa entregá nan petishon pa un pèrmit di ‘standplaats’ temporal na tempu pa por hasi esaki di forma legal i sigur. 

Pa por sigurá ku kosnan ta kana segun lei i reglanan vigente i tambe pa seguridat di tantu e bendedó(nan) komo klientenan di e lugá, ta nesesario pa esnan interesá hasi petishon na tempu pa por optené e pèrmit(nan) nesesario.

Pa por hasi petishon pa e pèrmit di ‘standplaats’ temporal, e petishonario mester trese e siguiente dokumentonan na Lokèt di Pèrmit:

• Formulario di petishon yená (optenibel riba loketdigital.gobiernu.cw);
• Karta di apoderashon (machtigingsbrief) i identifikashon di e apoderado (si akaso no ta e direktor/doño mes ta hasi petishon pa e pèrmit);
• Identifikashon bálido di e direktor/doño i su asistente(nan);
• Kopia di pèrmit di estadia (si akaso e direktor/doño òf su asistente(nan) ta estranhero);

• • Kopia di karchi di kür di G&Gz si tin benta di kos di kome i di bebe;

• Komprobante di pago pa e pèrmit;
• Karta di outorisashon di doño di tereno (den kaso di tereno privá);

• • Deskripshon kòrtiku i konsiso di e produktonan ku lo wòrdu bendé;
  • Deskripshon konsiso di kaminda e standplaats lo ta situá;
  • Foto, plachi òf deskripshon di e loke ta bai bende for di dje (stènt, trùk, mesa ets.)

• Stampia na balor di Fls. 20,- na momentu ku mester buska e pèrmit.

Pa petishon pa benta di vürwèrk ta rekerí, aparte di e dokumentonan ariba menshoná, tambe un pèrmit di Servisio di Obranan Públiko (DOW) enkuanto e sitio i/òf establesimentu kaminda ta bai ubiká vürwèrk pa benta, e asina yamá pèrmit di “voorhanden hebben”.

Petishon pa e pèrmit di ‘standplaats’ temporal pa bende e produktonan menshoná, mester keda hasí pa mas tardá djabièrnè 1 di desèmber 2023 próksimo na Lokèt di Pèrmit situá na Saliña 127 (pegá ku Subway). Pa benta di vürwèrk, e petishon pa pèrmit di ‘standplaats’ temporal mester ta entregá pa mas tardá djabièrnè 15 di desèmber 2023.

Tene kuenta, ku por entregá petishon online via https://loketdigital.gobiernu.cw/. Pa esnan ku no tin akseso na internèt, por hasi e petishon tambe personalmente na bali di Lokèt di Pèrmit. Pa mas informashon tokante bo petishon pa pèrmit, por yama departamento di intake na e number temporal ku ta +599 9 433-3123. 

MAS NOTISIA

Ministerio konserní: Desaroyo Ekonómiko