Publiká riba 18 Mart 2024
Willemstad – Servisio Meteorológiko di Kòrsou (Meteo) i di St. Maarten ta partisipá konhuntamente na e reunión anual di Komite di Orkan di Nort, Sentro Amerika, i Karibe di WMO for di 18 te ku 22 mart na Panama.
Anualmente, Organisashon Mundial di Meteorologia (WMO) ta organisá e reunión aki ku tur e outoridatnan meteorológiko di paisnan den e region pa kordiná i kolaborá tur asuntu relashoná ku impaktonan di Orkan den nos región. Esaki ta den kuadro di preparashon pa e Temporada di Orkan 2024. Manera ta konosí, Kòrsou i St.Maarten tin un miebresia konhunto na WMO.
Aña pasa tabata tin diferente sistema ku a afektá nos región. E tabata un temporada aktivo. Esaki a enserá 20 nòmber, 7 ku intensidat di orkan i 3 Orkan fuerte. Bret, Franklin, Harold Idalia, Lee, Ophelia, Philippe, Tammy. E paisnan afektá lo kompartí ku e komite nan eksperansia i praktika pa asina tur país por siña di esaki.
St. Maarten ta dispone di nan propio Radar for di aprel 2023. Den e kuadro regional, Merka ta pone su National Hurricane Committiee (NHC) disponibel na WMO i un RSMC pa vigilá e sistemanan huntu ku e paisnan den region.
Tambe e avionnanc esta e ‘Hurricane Hunters’ lo hasi buelo di rekonosimentu saliendo for di nan base na St. Croix. Dor ku e isla aki mes tabata den e trayektoria di un sistema tropikal aña pasa, algún buelo di e avionnan aki Hurricane Hunters a sali for di Kòrsou.
Durante di e reunión, lo elábora tambe riba diferente modelo numeériko ku a wòrdu uzá aña pasá pa asina duna indikashon di e sertesa di e modelonan, tambe durante intensifikashon rápido.
Trabounan di investigashon pa traha mapanan di “Storm Surge” ta wòrdu presentá den kolaborashon ku NHC. Asina paisnan por evaluá i tuma desishon kua ta e kostanan ku mester wòrdú evakuá. Tambe kursonan relashoná ku esaki, lo wòrdu duna. Kòrsou lo partisipá na a kurso aki durante e luna di aprel na Barbados.
Adishonal riba e tereno di teknologia, e promé estudionan lo wòrdu presentá relashoná ku e balor agregá ku inteligensia artifishal (AI) por tin riba formashon, pronóstiko, trayekto, intesidat i impaktonan di un siklon tropikal.
Na final lo aprobá kambionan hasí den e plan operativo pa asina sigui mehorá e kordinashon i kolaborashon durante di e Temporada di Orkan 2024.
Nos servisionan meteorológiko lo sigui prepará na nivel nashonal pa asina siguí amplia nos servisio na outoridatnan i públiko.
Den e forma aki nos lo sigui protehá nos komunidatnan kontra impaktonan di siklonan tropikal.