Publiká riba 17 Mei 2019
WILLEMSTAD – Riba rekomendashon di Promé Minister Rhuggenaath i na nòmber di Konseho di Minister di Kòrsou, Konseho di Minister di Reino a aprobá e proposishon pa nominá Sra. Michèle Russel-Capriles Gobernador suplente di Kòrsou. E nominashon ta drenta na vigor 1 di yüni 2019 i ta konektá ku e término di Gobernador Suplente aktual, sra. Römer-Kenepa, ku a transkurí.
Sra. Russel-Carpiles ta, mirando su pasado religioso, kultural i sosial, hopi kapas pa duna kontenido na su funshon den futuro. Den kurso di tempu el a okupá diferente posishon riba nivel di direktiva, loke ta demostrá su nivel di konosementu di e área polítiko-gubernamental den kua e ta bai funshoná. Ademas, su kontribushon aktivo na diferente proyekto sosial, prinsipalmente riba e área di arte i kultura i tambe edukashon, ta mas indikashon di su karakter emprendedor. Su envolvementu estrecho ku ‘Prins Bernhard Cultuurfonds’ i e museo kultural-históriko hudiu ta prueba di esaki. Sra. Russel-Capriles ta konosí tambe komo un persona íntegro ku un konsiensia di norma elevá.
Kòrsou por ta orguyoso di tin personanan kapabel manera sra. Russel-Capriles, ku ta dispuesto di ehekutá e funshon akí. E Gobernador suplente nobo lo huramentá pronto.
