Publiká riba 04 Novèmber 2020
WILLEMSTAD – Den e tempunan di reto ku nos pais ta enkontrá, empresarionan mikro, chikí i mediano por sigui konta ku e sosten i aporte di MiNEGOSHI. MiNEGOSHI ta un servisio di Ministerio di Desaroyo Ekonómiko (MEO) huntu ku e demas miembronan di e plataforma di MiNEGOSHI, konsistiendo di BAB, Kámara di Komèrsio, Fundashon Marshe, CITI, EU desk Curaçao, Korpodeko, Qredits i OBNA. Djabièrnè 30 di òktober, MiNEGOSHI a reuní ku un grupo di empresario lokal ku a aserká MEO pa konseho i sosten den e retonan ku nan ta konfrontá a kousa di Covid-19.
E grupo di empresario aki tabata konsistí primordialmente di personanan ku ta biba di e mundu di farandula aki na Kòrsou. Mientras nos ta sigui eksperensiá efektonan di Covid-19 den diferente área di nos bida diario, e grupo di empresario aki indiskutiblemente tabata un di e gruponan di mas vulnerabel durante e periodo aki.
Riba nan propio inisiativa e empresarionan lokal aki a aserká MEO resientemente i MiNEGOSHI a invitá nan pa un seshon di informashon, ya asina konhuntamente determiná kiko ta e áreanan di difikultat i kiko MiNEGOSHI por nifiká pa e empresarionan aki.
Durante e enkuentro riba 30 di òktober último e empresarionan a haña un presentashon di BAB pa komprondé mihó kiko ta nan deber i derechinan pa loke ta trata impuesto. Tambe nan a risibí un splikashon kiko tur MiNEGOSHI lo por nifiká pa nan, no solamente durante Covid-19, pero tambe den henter nan trayekto empresarial. Na final di e enkuentro, e empresario ku tabata deseá di hasi esaki por a traha un sita ku un di e coachnan di MiNEGOSHI pa nan por risibí guia i sosten personalisá.
MiNEGOSHI ta konsiderá e paso aki sumamente importante mirando kon vital e sektor di empresanan mikro, chikí i mediano ta pa nos ekonomia lokal. Tin hopi okashon kaminda e empresario aki tin bia ta keda sin risibí e yudansa, guia i sosten nesesario pa motibu ku e no ta tribi sali padilanti ku su retonan. Tin ora, pa falta di informashon tokante derechi i debernan di impuesto, bèrgwensa òf pa falta di e guia nesesario.Ministerio di Desaroyo Ekonómiko i e plataforma kompletu di MiNEGOSHI ta kla pa sigui brinda sosten, guia i yuda reforsá e sektor ku ta representá e wes’i lomba di Kòrsou su ekonomia. Si komo empresario bo tin mester di kualke informashon tokante e servisionan di MiNEGOSHI òf ke sa kiko MiNEGOSHI por nifiká spesífikamente pa bo empresa, tuma kontakto ku nos via email na info@Minegoshi.org, bishitá nos wèpsait www.minegoshi.org òf manda un mensahe via di e página di Facebook di MiNEGOSHI.
