Publiká riba 30 Aprel 2019
“No tin salú, sin salú mental”
Mini Konferensha Salú Mental i presentashon di vishon (nobo) pa salú mental
dia 7 di mei 2019
Willemstad – Ministerio di Salú Medio Ambiente i Naturalesa a kuminsá ku e trayekto pa yega na un vishon (nobo) pa e sektor di salú mental. Esaki a keda formulá konhuntamente ku “stakeholdernan” di área di salú mental na Kòrsou. Minister di GMN i su ministerio ta trahando pa promové salú (kual ta inkluí tambe salú mental di nos pueblo) dor di krea lugá di biba safe i salú i garantisando kuido di kalidat. Pa logra esaki reforma den e sektor di kuido aki ta nesesario. E enfoke mester kita for di kuido i malesa solamente i enfoká mas riba promoshon di salú, prevenshon, detekshon trempan, konsientisashon i kambio di komportashon.
Riba 7 di mei durante e mini konferensha lo presentá e vishon i lo presentá e stapnan ku lo sigui despues pa asina e transishon por tuma lugá. Na e okashon aki Minister Suzanne Camelia- Römer lo tei presente i lo habri e konferensha.
Pan American Health Organization (PAHO) lo trese un mensahe via video siguí pa mas oradornan internashonal manera Marijke van Putten kual ta miembro di hunta di komisariado di GGZ Noord Holland Noord i sikiatra na Hulanda ku lo amplia riba desaroyonan rondó di kuido ambulante i fortifikashon di profeshonal, kuido di salú mental digital i kuido ku ta “herstel gericht”. Sra. Van Putten su organisashon ta delantero riba tereno di salú mental i ta versá tambe riba e tema finansiamentu di e tipo di kuido aki. Otro orador ta Marcelino Mauricio, manager i direktor suplente di Mental Health Caribbean Bonaire ku lo splika e trayekto ku Boneiru a kana for di 2010 pa yega na e sistema di kuido aktual kual ta dunando masha bon resultado. Mental Health Caribbean Bonaire ta traha pa tur grupo di edat, di problema leve te ku problemanan kompleho i múltiple. Por último klientenan di sektor di kuido na Kòrsou lo duna nan testimonio.
E konferensha ta tuma lugá djamars 7 di mei di 8.30 di mainta pa 1’ or di mèrdia pero por kuminsá registrá for di 8’ or di mainta. E konferensha ta tuma lugá den ouditorio di Banko Sentral na Skalo i ta kompletamente grátis. Por inskribí te ku dia 5 di mei via di e-mail: ggzconferentie7mei@gmail.com. Pa mas informashon tokante e mini konferensha aki por tuma kontakto ku Ministerio GMN via number di telefòn 698 4937.
###
