Minister a firma kontrakt ku shofùrnan pa Transporte Eskolar - Informashon tokante Gobièrnu di Kòrsou

Notisia

Ministerio konserní Enseñansa, Siensia, Kultura & Deporte
 

Minister a firma kontrakt ku shofùrnan pa Transporte Eskolar

Publiká riba 25 Yanüari 2019

Minister di Enseñansa, Siensia, Kultura i Deporte, sra. Marilyn Alcalá-Wallé i shofùrnan di bùs di transporte eskolar a bini huntu pa firma kontraktnan ofisial pa e shofùrnan. Despues di mas ku 10 aña sin ku nan tabatin seguridat,  a traha kontrakt anual nobo pa shofùrnan di transporte eskolar. Danki na Ministerio di Enseñansa, Siensia, Kultura i Deporte den koperashon ku SITEK a yega na e dia históriko aki.

Shofùrnan di bùs di transporte eskolar tin nan kondishonnan laboral ofisialmente por eskrito di manera ku nan tambe tin seguridat di nan trabou. Alabes e akuerdo ta trese klaridat i transparensia. Kada kontrakt ta indiká kuantu i kua hóben e shofùr ta responsabel pa transportá.

Pa e motibunan ariba menshoná ta di sumo importansia pa Gobièrnu sera anualmente un akuerdo ku e shofùrnan. Por lo demas ta importante pa shofùrnan di transporte eskolar ta konsiente di nan ròl importante den e kampo di enseñansa.

For di ora e alumno drenta den bùs, el a drenta bou di e kuido di Gobièrnu. Pues shofùrnan ta ko-responsabel pa hiba i buska e muchanan for di skol i atendé korektamente ku nan i vice-vèrsa.Transporte eskolar ta un kondishon importante pa por alkansá e derechi fundamental riba Enseñansa pa asina huntu nos realisá e meta di un komunidat bon formá i konsekuentemente 0 dropout, konforme e Akuerdo di Gobernashon. Huntu nos ta realisá e máksimo potensial di nos pais.

Riba potrèt por mira Marilyn Alcalá-Wallé firmando kontrakt ku algun shofùr di bùs di transporte eskolar, den kompania di sr. Wladimir Kleinmoedig; direktor interino di Enseñansa i Siensia, sr. Lio Plantijn; presidente di SITEK i sra. Sahayra Braun-Nisbeth; Sekretario General di Ministerio di Enseñansa, Siensia, Kultura i Deporte.