Notisia

Willemstad – Minister Charles Cooper ta na Republika Dominikana pa partisipá na e Siman Sibernétiko ku ta parti di e konferensia titulá Latin America and Caribbean Cyber Competence Centre (LAC4). Esaki ta tuma lugá di 14 pa 17 di novèmber na Santo Domingo.

Minister Cooper a bai ku un delegashon konsistiendo di Sekretario General di VVRP, Sr. Dwigno Puriel, Hefe di Kabinèt di Minister Cooper, Sra. Islelly Pikerie, i Direktor di Bureau TeleCommunicatie en Post (BTP), Sr. Franklin Sluis.

Durante di e siman Cyberweek, lo tin diferente aktividat manera entre otro:

• Reunion Regional GFCE LAC 2022,
• FIRST-LAC4 Technical Colloquium,
• Diskushon di Prioridatnan regional EU CyberNet LAC,
• Workshop Communication – a Key Pillar in Solving Any (Cyber)crisis,
• Caribbean Regional Cybersecurity Exercise “CyberCrabs 2022”

Gobièrnu di Kòrsou a instituí un grupo pa atendé ku seguridat sibernétiko. E grupo aki ta enkabesá pa Minister Cooper i e meta ta pa krea un struktura di seguridat sibernétiko pa Kòrsou, tantu pa gobièrnu komo pa sektor priva. Ta atendé ku seguridat sibernétiko, maneho sibernétiko, i krimen sibernétiko. E grupo ta konsistí tambe di Minister di Hustisia, Minister di Asuntunan General, i Minister di Gobernashon, Planifikashon i Servisio Públiko.

E promé paso di e grupo lo mester ta pa desaroyá un strategia sibernétiko nashonal i apuntá un outoridat sibernétiko nashonal.  Den e kuadro aki, Minister Cooper a bishitá e konferensia CANTO, a reuní ku NCSC, i bishitá e evento HACKSHIELD. I awor, Minister Cooper ta partisipá tambe ta LAC4 na Santo Domingo.

E interes i ambishon ta pa Kòrsou bira un hub sibernétiko di LAC, i pa laga nos sentro di data bira un partner stratégiko di HACKSHIELD na Hulanda. Tur dos e aktividatnan aki lo por tin un spin-off positivo pa Kòrsou.

MAS NOTISIA

Ministerio konserní: Tráfiko, Transporte i Planifikashon Urbano