Notisia

Kòrsou lo kana trayekto pa bira miembro di WTO na 2026 durante #MC14

Di 26 pa 29 di febrüari 2024, Minister Cijntje ta partisipando na e di 13 konferensia ministerial di e organisashon multilateral di komersio internashonal World Trade Organization – WTO. E konferensia ta tumando lugá na Abu Dhabi. 175 Minister i Dignatario di paisnan miembro di WTO ta na Abu Dhabi pa diskutí tokante reglanan di komersio en general i ku atenshon pa peska, agrikultura, e-commerce, fasilitashon di komersio i invershon, desaroyo di empresanan chikí i desafionan relashoná ku komersio i kambio di klima, geopolítika i tambe kadena di distribushon. Den un mundu fragmentá dor di krisisnan kousá dor di kambio di klima, guera, pero tambe vandalismo, ta esensial pa yega na reglanan di komersio i un sistema multilateral di komersio ku ta duna resultado, ta accountable, transparente, predesibel i sostenibel. 

Mas ku 200 pais, organisashonan Internashonal i NGO’s ta bin huntu kada 2 aña pa evaluá e sistema di komersio internashonal multilateral i adaptá of bin ku reglanan nobo ku ta sòru pa komersio por tuma lugá di un forma hustu, balansá, transparente i ku ta garantisá adelanto di tur hende. 

Minister Cijntje ta kompañá pa su team negoshadó liderá pa Caryl Monte, huntu ku Direktor di Relashonan Ekonómiko Internashonal di MEO Vanessa Toré, Hefe di Douana di Kòrsou Soraya Pols-Strick i konseheronan di Minister Juleyma van Heydoorn-Mercelina i Tyzik Lispier. 

Kòrsou i WTO
Kòrsou a apliká pa bira miembro independiente den World Trade Organization formalmente na òktober 2019 i aktualmente Kòrsou ta miembro opservadó for di 3 di mart 2020. Nos ambishon ta pa integrá ekonómikamente mas tantu posibel den nos región i sobrá di mundu i asina oumentá eksportashon, lokual ta sumamente importante pa krese nos ekonomia. E integrashon aki ta solamente posibel siendo miembro di WTO ya ku reglanan di komersio internashonal ta keda atendé den e plataforma aki, i tur pais ku ta den nos region ta aktua i negoshá segun e reglanan di WTO. Ya kaba negosiashonnan ta andando den e kuadro aki ku Colombia, Repúblika Dominicana, Trinidad i Tobago i próksimamente lo start ku Suürnam i después Caricom, pa por sera akuerdonan komersial bilateral. 

Ademas di hasi integrashon ekonómiko den region i den mundu posibel pa Kòrsou, WTO ta brinda un sistema ku ta duna transparensia na tur, tantu paisnan grandi i chikitu, basá riba su sistema di akuerdo multilateral, plurilateral i bilateral. Akseso na WTO ta enserá ku nos reglanan di komersio, manehonan, leinan, kòntrol riba kalidat, transparensia di informashon, un merkado kompetitivo pa nos empresanan i invershonistanan, i tambe nos servisionan mester ta na òrdu. WTO ta duna apoyo tékniko na gobièrnu di paisnan ku apliká pa bira miembro. Anto siendo miembro independiente den WTO nos ta konta! Nos ta partisipá den trahamentu di regla di komersio i mundu ta tene kuenta ku nos ta chikí i vulnerabel. Den e kuadro aki tambe MEO a desaroyá su National Export Strategy (NES) ku sosten di Internashonal Trade Centre (un supsidiario di WTO i Nashonnan Uní) pa yuda nos pa drenta e arena di komersio internashonal ku un base mas sólido. E NES ta yuda nos mehorá nos kompetividat pa nos por partisipá na e tráfiko komersial i kompetí i logra hasi mas i mihó negoshi.

Komishon Permanente
E trayekto pa miembresia independiente den WTO ta keda ehekutá pa e Komishon Permanente di Komèrsio Internashonal i Relashonnan Ekonómiko Internashonal instituí na sèptèmber 2017. E ta un komishon multidisiplinario i tin un presidente ku ta independiente i eksperto riba e tereno den persona di Caryl Monte. Banda di esei, diferente organisashon i ministerio ta enbolbí den e komishon permanente manera Ministerio di Desaroyo Ekonomiko, Ministerio di Finansas representá pa Douane, Directie Buitenlandse Betrekkingen di Ministerio di AZ, Ministerio di SOAW, Ministerio di GMN, FTAC i BTP. Presidente di e Komishon Permanente ta e negoshadó prinsipal pa Kòrsou den WTO i tambe pa e Akuerdonan Komersial Bilateral ku paisnan den nos region. 

Korsou lo bira miembro di WTO na 2026
Durante un reunión ku WTO su Divishon di Akseso i ku e presidente di e grupo di trabou ku ta bai guía Kòrsou su proseso pa bira miembro independiente, Embahador di Barbados na Ginebra, Honorabel Mathew Wilson, a stipulá e ruta pa Kòrsou bira Miembro Independiente di WTO na 2026. Nos mester kana e trayekto di un forma konsistente i den bon kordinashon ku WTO. “Nos ta spera di konkluí e negoshashon di tal manera ku pa e siguiente Ministerial Conference na aña 2026, ku lo tuma lugá na Cameroon, nos por bira miembro independiente di WTO”, minister Cijntje ta indiká.

Agenda kargá
Banda di partisipá na e reunión ministerial Minister Cijntje i su delegashon ta hiba kombersashonan ku representantenan di otro paisnan di interés manera ku Hulanda, Barbados, Republika Dominikana, Union Europeo i tambe ku WTO i International Trade Centre. Durante un side event organisá pa Hulanda i ITC, Minister Cijntje a establesé kontakto ku Union Europeo i Ghana, relashoná ku un proyekto finansiá pa Hulanda pa traspaso di konosementu riba área di Agritech pa ekipá agrikultornan ku inovashon i teknologia pa desaroyo di agrikultura moderno i asina garantisá seguridat di kuminda. Huntu ku ITC i Union Europeo i Hulanda ta bai traha riba un plan pa henter Karibe i Afrika!.

Minister Cijntje a probechá ku e ta na Emiratonan Arabe pa hasi algún bishita di follow-up. Awe ela topa ku IRENA – ku ta e Agensia Internashonal di Energia Renovabel ku ta keda na Abu Dhabi. Huntu ku IRENA Kòrsou ta bai modernisá su maneho di energía. Irena tin programanan spesial pa islanan chikٕí i regularmente funshonarionan di MEO i di e kadena energétiko di Kòrsou ta sigui training i reunionan. 

MC13 lo finalisá djahueps 29 di febrüari. Minister Cijntje lo pasa tambe un dia na Dubai pa algún kombersashon ku invershonistanan ku interés den Kòrsou. Djabierne 1 di mart e delegashon lo sali Abu Dhabi rumbo pa Kòrsou.