Publiká riba 01 Mart 2023
Willemstad – Riba djaluna 27 di febrüari, Minister Charles Cooper huntu ku su Hefe di Kabinèt, Sra. Pikerie, i Sekretario General (SG) di VVRP, Sr. Puriel, a tene diferente reunion ku Konseho Europeo tokante asuntunan sibernétiko.
Promé a reuní ku e Representante Permanente di Reino Hulandes (PV) na Straatsburg, kaminda Konseho Europeo ta ubiká. Meta di e enkuentro aki tabata pa alineá pensamentunan, i prepará pa e reunionnan ku Konseho Europeo. E PV Straatsburg ta sirbi interes di Kòrsou tambe den Konseho Europeo.
Seguidamente, tabata tin un reunion ku Direktor di Asuntunan Sibernéiko di Konseho Europeo, Sr. Patrick Penninxk. Ku Sr. Penninxk a interkambiá unda Kòrsou ta para den e trayekto sibernétiko ku nos a kuminsá, i den ki forma i unda nos ta di opinion ku Kòrsou mester di sosten di Konseho Europeo. Meta di e enkuentro aki tabata pa por yega na un koperashon ku Konseho Europeo.
Gobièrnu di Kòrsou ta rekonosé e importansia di derechonan humano, ku ta balornan importante ku Konseho Europeo ta promové. Gobièrnu di Kòrsou a realisá ku, pa e por salbaguardiá e balornan aki i garantisá un desaroyo duradereo den e era digital, ta di sumo importansia pa implementá medidanan pa hasi Kòrsou mas resistente sibernétikamente.
Despues di e kombersashon ku e Direktor di Asuntunan Sibernéiko di Konseho Europeo, Sr. Patrick Penninxk, Minister Cooper, akompañá pa Minister Plenipotensario Sr. C. Manuel, a hiba un kombersashon ku Sekretario General ‘adjunct’ di Konseho Europeo, Sr. Björn Berge.
Den e reunion aki, Sr. Bjorn Berge a palabrá konkretamente ku Minister Cooper lo manda un karta ofisialmente pidiendo Konseho Europeo pa bin Kòrsou pa hasi un mishon konsultativo, pa determiná unda i kon Kòrsou lo haña sosten di Konseho Europeo den e trayekto sibernétiko.
