Publiká riba 28 Mart 2024
Willemstad – Riba 26 di mart, Minister Cooper Willemstad Parkeer Beheer ta firma akuerdo pa maneho di parkermentu den Punda i Otrobanda. Despues di un destaho públiko, un komishon a analisá tur e proposishonnan, i a skohe Willemstad Parkeer Beheer pa por manehá e sitionan di parker den Punda i Otrobanda. Willemstad Parkeer Beheer ta kombinashon di DMO i SKO.
E balor agregá di nan proposishon ta ku nan a indiká ku kualke ganashi di e proyekto, lo wòrdu invertí bèk den Sentro di Siudat. A tuma deliberashon intensivo pa yega na un akuerdo konkreto. Den esaki, Willemstad Parkeer Beheer lo haña e derecho pa por manehá sitionan di parker indiká den Punda i Otrobanda pa 5 aña.
Ainda tin algun detaye pa kaba di atendé, pero ku firmamentu di e akuerdo por kuminsá hasi e promé stapnan. Lo sigui ku e siguiente fase, esaki bestèl e aparatonan. E tarifa lo keda meskos, i lo introdusí teknologia moderno pa paga. Den e akuerdo tin indiká tambe un montante fiho ku Willemstad Parkeer Beheer lo mester paga gobièrnu.
Willemstad Parkeer Beheer lo traha huntu ku Securitas BV i Flowbird SAS pa realisá esaki i ta spera di ta operashonal mas tardá den 5 luna.
Pa e shofùr ku ke parker na Punda òf Otrobanda, esaki ta nifiká ku pronto lo por paga pa parker na diferente manera. E método di pago mas amigabel pa kliente ta pa usa e aplikashon móbil di Curaçao Flowbird, ku por ser deskargá den Apple Store òf Google Play. Despues di instalá e aplikashon, ta sòru paga fásil ku karchi di krédito òf débito, i registrá e number di plachi di e outo pa un biaha so. Despues di parker e outo, e persona por skohe kuantu tempu e ke parker riba e aplikashon, primi start i tur kos ta kla. Esaki no ta solamente un método di pago sigur, pero no ta nesesario pa bai na un parker meter pa paga; e telefòn ta e parker meter. Si e tempu di parker a pasa, lo tin un notifikashon outomátiko na tempu i e persona por rekargá e tempu di parker for di kualke lugá.
Un otro método di pago ta e uso di e Curaçao Parking Card pre-pagá ku por swipe sin kontakto na e meternan. Ademas, lo tin tambe e opshon pa paga ku moneda. Ora di paga na e parker meter, solamente ta nesesario pa hinka e number di plachi i laga e teket den e outo.
En total, lo kumpra 44 meter di parker di Flowbird Strada Generation 3 ku ta traha riba energia solar i tin un skèrchi di koló grandi, asina ku nan por ta fásil pa lesa hasta den solo briante. Pa kontrolá e parker, lo empleá ‘handhavers’ spesial ku ta di train komo Agente Ekstraordinario di Polis, i nan lo usa vehíkulonan spesial desaroyá pa maneho di parkeo.
E ‘bestelling’ pa tur ekipo i aparato lo tuma lugá promé ku fin di e luna aki, di manera ku konforme ku e akuerdo ku gobièrnu den 5 luna e maneho di parker lo ta operashonal. Den e akuerdo aki a konkluí ku 25,5% di e sitionan di parker lo bolbe na gobièrnu i DMO/SKO lo usa e sitionan ku nan risibí pa mehorá e sentro di siudat. Ademas, lo instalá stashonnan di karga pa outo eléktriko den e sentro di siudat, ku ta konektá ku e idea di SMART CITY.
Gobièrnu huntu ku Willemstad Parkeer Beheer lo sigui duna mas informashon den transkurso di lunanan benidero.
