Publiká riba 02 Desèmber 2022
Willemstad – Minister di Tráfiko, Transporte i Planifikashon Urbano, Charles Cooper, huntu Minister di Enseñansa, Siensia, Kultura & Deporte, Sithree van Heydoorn, huntu ku Minister di Desaroyo Ekonómiko, Ruisandro Cijntje, a hasi apertura di e wikènt di selebrashon di 25 aña ku Willemstad ta riba lista di Patrimonio Mundial di Unesco.
Durante e fin di siman, nos sentro di siudat, distrito di Pietermaai, Punda, Scharloo i Otrabanda, lo ta di fiesta. Sektor privá i gobièrnu a uní pa por ofresé pueblo di Kòrsou un wikènt pa nos selebrá huntu, apresiá nos herensia i nos monumentonan, i trese bida den nos sentro di siudat.
Riba djabièrnè, djasabra i djadumingu tin diferente aktividat. Manera entre oreo Road2Plaza, Christmas Fair na Pietermaai, i diferente establesementu di horeca lo ta habrí ku entretenementu enbibu.
Palasio di Gobernador lo ta habri riba djasabra 3 di desèmber entre 2or di mèrdia pa 4or di atardi. Fort Amsterdam tambe lo tin diferente eksposishon den nan kura. Riba djadumingu 4 di desèmber, Fundashon Pro Monumento tin su Dia Habrí di Monumento entre 10or di mainta pa 6or di atardi,. Amphi teater ta habri i lo pasa diferente video. Sifma tambe a djòin pa por ofresé nos muchanan un dia alegria. Pundo lo tin klousura di e wikènt di selebrashon ku diferente aktividat i musika, den forma di presentashon di e kantika ‘Willemstad’ dor di D-BO i Randell Corsen.
ABC Busbedrijf lo inkorporá mas bùs pa por kubri e rutanan ku direkshon p nos sentro di siudat.
Minister Cooper ta invitá un i tur pa bishitá e paginá di evento Willemstad25, pa por wak e skema di e wikènt kompletu.
