Publiká riba 02 Desèmber 2022
Willemstad – Minister Charles Cooper a hasi entrega di e pèrmit di konstrukshon na Antelecom N.V. dia 1 di dèsember. Antelecom N.V. ta bai konstruí un ‘loods’ moderno ku lo ta ‘energie neutraal’, esta ku e lo bai hasi bon uso di Kòrsou su bientu fuerte i konstant, i Kòrsou su solo. Esaki ta nifiká ku no mester bai usa hopi èrko na sierto áreanan, i konsekuentemente lo redusí konsumo i gastu di koriente.
Ku e ekspanshon aki, Antelecom N.V. lo por duna mas servisio na pueblo di Kòrsou i nos region. Mas operashon den Karibe ku lo por nifiká tambe ku lo habri mas kúponan di trabou.
Kòrsou su ubikashon, esta pafo di e ‘huricane zone’, ta pone ku for di akinan lo por sirbi nos region mas mihó i ku konfiansa. E proyekto aki lo ta un invershon di 2.2 mion florin. Tur materialnan di konstrukshon lo ta kumprá lokalmente, i trabounan lo wòrdu hasí dor di kompanianan lokal ku trahadónan lokal. Trabounan di konstrukshon lo dura entre 6 pa 9 luna i ta planiá pa inisiá promé ku fin di aña.
Ku esaki, Minister Cooper ta konvensí di ta sigui duna un empuhe na ekonomia di nos país ku poko poko pero sigur ta bayendo den un bon direkshon.
