Publiká riba 25 Aprel 2023
Willemstad – No ta proyektonan grandi so ta na kurason di Minister Charles Cooper. Huntu ku Servisio pa Planifikashon Urbano (ROP), Minister Cooper a hasi entregá 3 pèrmit di konstrukshon na Fundashon Kas Popular (FKP). Esaki pa konstrukshon di total 426 bibienda sosial! Un sifra nunka bisto den e último 10 añanan!
E kasnan ta repartí entre 3 bario, esta:
– Tera Kòrá. Lo sigui ku fase 4 di e proyekto di konstrukshon di kasnan den e bario, kaminda lo konstruí 11 flèt pa akapará un total di 132 bibienda,
– Sapaté. Ta bai konstruí 10 flèt ku un total di 138 bibienda,
– Fortuna Ariba. Ta bai konstruí 14 flèt ku ta akapará un total di 156 bibienda.
E desaroyo di bibienda sosial ta un nesesario, mirando e nesesidat di nos komunidat pa bibienda sosial i e lista di espera grandi na FKP. Pa mas informashon tokante kada proyekto en partikular, por tuma kontakto ku FKP.
Desaroyo di konstrukshon pa kas sosial, ta kontribuí sigur na un impulso ekonómiko pa Kòrsou pero tambe alivio pa pueblo ku mérese nan binienda sosial.
Minister Charles Cooper ta hopi kontentu ku e desaroyonan aki i ta deseá FKP éksito durante konstrukshon.
