Publiká riba 10 Sèptèmber 2021
Willemstad – Riba djaweps 9 di sèptèmber, Minister Cooper di Ministerio di Tráfiko, Transporte i Planifikashon Urbano (VVRP) a hasi traspaso di un vehíkulo di reskate, anteriormente di Brantwer Kòrsou, na e organisashon CITRO.
Algun tempu pasa CITRO a hasi petishon na Gobièrnu pa un vehíkulo di reskate. CITRO ta disponé di 1 vehíkulo i tabata tin e nesesidat di ekspanshon di su kapasidat. Esaki a bira un realidat, na momentu di e traspaso pa un montante simbóliko.
CITRO ta un organisashon boluntario ku ta hasi reskate, primordialmente riba laman. Nos por kòrda kon CITRO su boluntario a yuda dia di Thomas, te asta ku un a pèrdè su bida.
Awor, CITRO ta disponé di un vehíkulo mas pa por ehersé su trabounan aun mas mihó. Pabien na Citro i sigui ku e bon trabou!
