Notisia

Willemstad – Minister Charles Cooper ta hasiendo diferente esfuerso simultaneamente pa hasi Kòrsou un hùb digital pa Karibe i Sur Amerika riba e tereno sibernétiko. Tambe Minister Cooper tin komo meta pa hasi Kòrsou mas resiliente pa loke ta seguridat sibernétiko. Den kuadro di esaki, Minister Cooper a bolbe reuní riba djamars 7 di mart ku representante permanente (PV) di Reino Hulandes na Genève Swisa, Sr. Paul Bekkers. Sr. Bekkers tabata na Kòrsou.

Durante di e reunion, a interkambiá riba diferente aspekto manera entre otro:

• Kiko Sr. Bekkers komo PV di Reino Hulandes por nifiká pa Kòrsou,
• Kòrsou komo hub digital pa Karibe i Sur Amerika,
• Bentahanan di Kòrsou su kabel 4-tier,
• Union Internashonal di Telekomunikashon (ITU). Esaki ta un organisashon spesialisá di Nashonnan Uní,
• CANTO ku ta un asosiashon di diferente ‘stakeholder’ den e sektor di ICT, ku ta enfoká riba Karibe,
• Postulashon di Dr. Albert Martis komo Sekretario General pa WMO,
• I mas.

Den e delegashon di sr. Paul Bekkers tabata presente:

• sra. Audrey Goosen, ku aktualmente ta traha na Union Europeo na Bruselas, i ku entrante yüli lo bira Hefe di Departamentu Ekonómiko di PV,
• sra. Vanessa Dijsseldonk, Direktorado di Asuntunan Eksterior,

Tambe tabata presente sr. Roelof Bunninga komo Representante speshal di islanan karibense di Ministerio di Asuntunan Eksterior.

Di Banda di Minister Cooper tabata presente:

• sr. Ir. Dwigno Puriel, Sekretario General di Ministerio di VVRP, i
• sra. mr. Islelly Pikerie, Hefe di Gabinete di Minister Cooper.

Huntu a palabrá ku sr. Puriel i sra. Pikerie, lo aserká e kolaboradó di PV na Genève, Swisa ku tin asuntunan sibernétiko den su kartera, pa inventarisá den tur e organisashonnan ku tin na Genève, tantu internashonal i di Nashonnan Uní, pa evaluá kon i den ki kuadro Kòrsou lo por aserká nan.

MAS NOTISIA

Ministerio konserní: Tráfiko, Transporte i Planifikashon Urbano