Publiká riba 21 Yanüari 2021
Endrew Isabella ta un alumno ehemplar di St. Jozef VSBO ku semper a sa di destaká den tur lokual ku el a hasi. Endrew tabata un hóben ku apesar di su malesa króniko, semper a mantené perseveransha, positivismo i determinashon. Lamentablemente Endrew a pèrde e bataya kontra su malesa 11 aña pasá, pero te awe nos ta rekordá lokual el a nifiká pa hopi hóben. Pa e motibu akí, nos ta keda konmemor’é tur aña di un forma speshal riba 21 di yanüari.
Durante di e bishita na e skol, a tene un reunion ku konseho di alumno kaminda nan a deliberá riba deferente punto di preokupashon di e studiantenan pa ku enseñansa. Minister a bai na departamento di inovashon i enseñansa kaminda a tene un demostrashon di e proyektonan ku tin andando Na mes momentu a tene un seshon di grabashon/produkshon den e skol su media room.
Durante di e mainta sra. Ingrid Isabella-Ipatia tambe a duna un tremendo spich di motivashon na e alumnonan i a duna kada alumno un bòter di “handsanitizer” komo rekuerdo, huntu ku un di e dichonan di Endrew ku ta bisa: NEVER GIVE UP, NEVER LOOK BACK. Mi ta den gran forma … Abo awó? Alumno Detickson Ellensburg a deklamá un poema pa Minister i finalmente Minister a entregá un bunita sertifikado di apresio na alumno Michelle Rosario Agudelo ku a destaká durante aña.
Ministerio di Enseñansa, Siensia, Kultura i Deporte por mira bèk riba un mainta eksitoso i alabes ta felisitá tur alumno di Kòrsou ku e dia akí. E mensahe importante na tur alumno riba e dia di awe ta pa nunka entregá. Sigui ku perserveransia pa logra bo metanan, meskos ku alumno Endrew Isabella a logra su metanan apesar di su malesa!
**Riba e fotonan athunto por tuma nota di e bishita na e skol di VSBO:
Pa mas informashon por bishita facebook di MInisterio di ESKD: Fotonan bishita na Sint Jozef VSBO dia 21 yan. 2021
