Notisia

WILLEMSTAD – Gobièrnu di Kòrsou ta kana diferente trayekto den kuadro di enseñansa, komo ku esaki ta prioridat pa optimalisashon den e ramo aki. Huntu ku tur ‘stakeholder’ di den enseñansa ta drecha infrastruktura físiko di nos skolnan. Den kuadro di esaki, Minister di Enseñansa, Siensia, Kultura i Deporte (ESKD) sr. Eugene Rhuggenaath ta bishitá e skolnan ku keda renobá. E skol di fundeshi Prinses Margriet School den bario di Buena Vista a haña bishita di Minister di ESKD pa tuma nota di e renobashon. Alabes alumnonan bou di guia di dosente i kabes di skol a prepará un mainta festivo pa e bishita di Minister na nan skol.

Sektor di Enseñansa i Siensia huntu ku Reda Sosial i Direktiva di Skolnan Públiko ta kana e trayekto pa durante di aña skohe e skolnan ku ta bin na remarke pa haña renobashon. Asina por tuma nota di e skolnan di fundeshi Elis Juliana/Sheila Karel i Krijtschol ku a keda renobá. Den e siman benidero e kontratista lo hasi entrega ofisial di Prinses Margriet School na Direktiva di Skolnan Públiko. Un otro ehèmpel banda di esaki ta ku dosentenan di VSO-ZMLK Mirieta Alberto na Suffisant tambe ta den preparashon pa pronto muda pa un edifisio renobá.

Durante di e temporada ku ta na kaminda di vakashon lo sigui traha na e skolnan pa asina por garantisá ku e alumnonan ta sigui enseñansa den un ambiente agradabel i moderno. Gobièrnu ta keda pone atenshon i enfoke na nos enseñansa komo ku esaki tin prioridat konforme e programa di gobernashon.

—
KOMUNIKASHON

Pa mas potrèt klik aki: Relato Fotográfiko bishita na PMS