Publiká riba 01 Febrüari 2022
WILLEMSTAD – Minister Cijntje a reuní ku Ontwikkelingsbank van de Nederlandse Antillen N.V. (OBNA), Fundashon Marshe i Curaçao Tourism Development Foundation (CTB) huntu ku miembronan di su tim di maneho pa konkretisá e plannan di renobashon di Plasa Nobo.
Gobièrnu di Kòrsou a bai di akuerdo pa Minister Cijntje pone e montante di NAf. 500.000 disponibel pa asina inisiá e mantenshon i renobashon di Plasa Nobo.
E marshe akí tin un ròl importante den nos sentro di siudat. Mantenshon i renobashon di e plasa lo kontribuí na engrandesé e balor kultural di nos sentro di siudat i alabes e bista general di e área. Esaki tantu pa komunidat lokal komo turistanan ku ta bishitá Plasa Nobo.
Segun Minister Cijntje e mantenshon i renobashon akí ta kontribuí na e meta di Gobièrnu pa modernisá e plasa, halsa e nivel di seguridat pa usuario i bishitantenan di e plasa i mehorá e parti di higiena. Intenshon ta pa Plasa Nobo haña un identidat nobo ku funshonnan atraktivo banda di e funshon di marshe. Esaki lo atraé públiko durante tur parti di dia (inkluyendo den oranan di anochi), lokual lo kontribuí na stimulá mas aktividat ekonómiko i revitalisá nos sentro di siudat.
Ministerio di Desaroyo Ekonómiko huntu ku OBNA lo ta esnan enkargá pa konhuntamente garantisá ku e trabounan ta keda konkretisá den e tempu palabrá, den deliberashon estrecho ku Fundashon Marshe pa asina garantisá ménos molèster posibel pa trahadó i bishitantenan den e plasa.
A aserká CTB tambe komo eksperto riba e área turístiko pa duna sosten i guia na e proyekto akí.
Minister Cijntje lo sigui vigilá e proyekto di aserka pa asina Plasa Nobo por bira un sentro kaminda un i tur ta sinti nan mes na kas.