Notisia

WILLEMSTAD –  Ministerio di Enseñansa, Siensia, Kultura i Deporte (ESKD) den koperashon ku Direktiva di Skol Katóliko i Direktiva di Skol Públiko huntu ku Minister di ESKD sr. Sithree van Heydoorn, a bishitá algun skol riba e promé dia di aña eskolar 2021/2022.

E mainta a kuminsá na Kolegio San Dominico den e bario di Montaña kaminda huntu ku kolaboradó di gabinete sr. E. Bishop, funshonario di skolnan katóliko, pastor katóliko, representante di e parokia di Montaña i parlamentarionan Fergino Brownbill, Ramon Yung i Gwendell Mercelina, a partisipá aktivamante na e seremonia chikitu durante apertura di aña eskolar 2021/2022. Despues a sigui pa Kolegio San Martin de Porres na Santa Rosa kaminda Minister van Heydoorn a pasa kumindá tur alumno i maestro di tur e gruponan huntu ku e kabes di skol. Un punto di atenshon ta ku Kolegio San Martin de Porres ta hopi kontentu ku awor sí nan kurá di skol ta kedando kla.

Seguidamente a bishitá e skol speshal di fundeshi Marieta Alberto na Koraalspecht, kaminda minister a kombersá ku tur e alumnonan bou di ‘overdekte’, pasó asina por a tene e distansia soshal. Un punto di atenshon na e skol akí ta ku riba e kaminda i lugá di stashoná outo por tuma nota di hopi sushi. Skol a pidi minister pa yudanan ku esaki komo ku ta hasi e limpiesa i tòg den un tempu kòrtiku ta bin tira sushi bèk riba e lugá. Minister van Heydoorn na su turno a tuma bon nota i indiká ku lo e papia ku su kolega minister tokante e situashon akí.

Despues a bishitá un otro skol speshal di fundeshi ku ta Skol Myrna Dovale den e bario di Steenrijk. Aki ta kaminda maestronan ta traha ku hopi atenshon pa e muchanan ku tin problema ouditivo (speciaal onderwijs voor dove/slechthorende en ESM (ernstige spraak- en taalmoeilijkheden) kinderen). Minister a haña un splikashon amplio di e aktividatnan edukativo i a tuma nota di vários lokalidat ku mester di manteshon. Minister huntu ku e direktor di skolnan públiko sr. Römer i e funshonario di skolnan públiko, a indiká ku esaki tin nan atenshon i ku ta bai traha pronto riba esaki.

Por último Minister van Heydoorn a bishitá e skol di fundeshi Joan Maurits. Aki tambe a pasa serka tur e gruponan i kombersá ku e alumno- i maestronan. Un punto hopi remarkabel di e skol akí ta ku Minister a bin topa ku un maestro ku a kuminsá traha pa promé biaha na skol i a haña esaki hopi alentador, ya ku ta e intenshon pa sigui motivá nos hóbennan pa bira maestro.

Minister di ESKD sr. Sithree van Heydoorn, na nòmber di Gobièrnu, ta deseá tur alumno, maestro, dosente i tur otro trahadó di enseñansa un komienso di aña eskolar fruktífero. Alabes e ta hasi un yamada na tur alumno pa nan saka kara di nan mayornan dor di traha duru riba nan desaroyo, pa asina por guia nos pais den futuro. Na mes momentu Minister ta pidi tur alumno pa ban trata nos maestro- i dosentenan di un manera respetuoso i apresiá e trabou ku nan ta hasi pa desaroyo di nos pais. 

** Riba e fotonan athunto por tuma nota di un parti di e rekorido. Pa mas potrèt por bishita página di Facebook di Ministerio di ESKD