Notisia

Willemstad, 25 di yüni 2025 – Justitiële Jeugdinrichting Curaçao (JJIC) ku ántes tabata konosí bou di e nòmber GOG huntu ku Minister Shalten Hato ta kontinuá ku e trayekto nobo pa desaroyá e organisashon den un manera ku e por sostené su futuro. Bou di e nòmber ‘Krese’ ku ta simbolisá forsa, direkshon i restourá. E plan aki ta duna solushon na e problema struktural den organisashon i ta pone énfasis riba akuerdo kla, mihó kolaborashon i espasio pa kresementu.

JJIC promé ku Gabinete Pisas 2 a enfrentá un preshon grandi. Durante di periodo anterior komo Minister di Hustisia, Minister Hato a para ketu na fortifiká e organisashon ku entre otro personal ku e organisashon tabata tin hopi mester di dje. Sinembargo e kuido i guia ku JJIC ke brinda e muchanan ta eksigí un poko mas tambe di struktura i mas atenshon na entre otro drecha ku mas personal, modernisá e struktura di trabou antikuá na unda por duna espasio tambe pa mehorá huntu den e organisashon riba vários tópiko importante.

Un rumbo nobo ku un bista klaru
Ku ‘Krese’, JJIC ta tuma un direkshon nobo. E trayekto di desaroyo ta enfoká tantu riba aspekto kontenido komo riba e organisashon mes i ta wòrdu apoyá pa SOAB. E durashon di e trayekto ta inisiá for di yüni 2025 te aprel 2026.

E nòmber ‘Krese’ netamente a ser skohé pa ta un símbolo den e organisashon: e ta reflehá ambishon di ekipo pa sali mas fuerte for di e desafio ku nan ta enfrentá. “E plan aki a kuminsá pa nos por traha huntu na un JJIC ku ta preparando pa futuro – ku akuerdo kla, mihó kolaborashon i espasio pa krese,” segun direktor di JJIC.

Sinku pilar prinsipal di ‘Krese’:

1. Direkshon kla
   JJIC ta traha riba un bista stratégiko pa futuro ku lo guia tur nivel den organisashon. E bista aki ta sirbi komo base pa ehekushon i evaluashon.
2. Mihó kolaborashon
   Kolaborashon interno entre departamento i kolaborashon eksterno ku otro instansia ta fortifiká. Dor di konektá i partí konosementu, nos ta logra mas koherensia den guia di nos muchanan den JJIC.
3. Struktura kla
   Struktura di trabou aktual i deskripshon di funshon lo wòrdu revisá.
4. Traha huntu
   Empleado ta aktivamente partisipá den e proseso di mehora. Basá riba nan eksperensia den práktika, nan ta kontribuí ku solushon realista i efisiente. Tambe e muchanan den e instituto lo wòrdu skucha na e momentu ku esaki ta posibel.
5. Desaroyo di personal
   Invertí den hende ta un parti esensial di e trayekto. Formashon, guia personal i coaching na lugá di trabou lo yuda empleadonan pa sigui desaroyá i sinti mas satisfakshon den nan trabou.

Bista riba e futuro
Durante e lunanan ku ta bin, vários tayer, evaluashon i entrenamentu lo wòrdu organisá pa fortifiká e organisashon paso pa paso. Direktor di JJIC, sra. Charette Pinedoe, ta enfatisá ku esaki no ta un proyekto independiente, sino un kambio struktural: “Nos ta traha riba un base firme pa awor i pa futuro. Muchanan mester risibí e mihó guia posibel, i nos koleganan di JJIC mester por kontá riba klaridat, sosten i espasio pa nan mes krese.”

Minister di Hustisia, mr. Shalten Hato, ta apoyá e trayekto di ‘Krese’100%: “JJIC tin un ròl vital pa nos hóben i hustisia. Ku ‘Krese’ nos ta demostrá kurashi i vishon. Esaki ta un invershon den seguridat, den hóben i den nos sosiedat mes.”

Ku e apoyo profeshonal di SOAB, e trayekto lo wòrdu guia i sigui kontrolá. Na fin di aprel 2026, e proseso di optimalisashon mester ta kla, ku e meta pa yega na un JJIC ku ta prepará pa futuro: fuerte, humano i profeshonal.

MAS NOTISIA

Ministerio konserní: Hustisia