WILLEMSTAD- Awe den oranan di anochi a surgi un insidente grave i lamentabel na Jeugd Justitiële Inrichting (JJIC), kaminda un miembro di un famia ku ya a protagonisá diferente insidente anteriormente i ku den pasado a keda detené, a drenta tereno di e instituto i a kometé akto di violensia i destrukshon. Durante e insidente, e agresor a agredí dos hóben ku ta keda den e instituto. Ademas, el a kousa daño konsiderabel na outonan i otro propiedat di e instituto.
Minister di Hustisia, mr. Shalten Hato, ta konsiderá e akshonnan aki totalmente inaseptabel. Seguridat, òrdu i un ambiente stabil ta kondishonnan esensial pa e desaroyo, guia i rehabilitashon di e hóbennan ku ta risibí kuido den JJIC. Kuerpo Polisial Kòrsou (KPC) a aktua ku rapides i a logra detené e agresor mesora na e sitio despues di e aktonan di destrukshon i agreshon.
Minister Hato ta lamentá profundamente ku e mesun famia na repetido okashon ta keda kometé aktividatnan ku ta perturbá trankilidat, disipliná i proseso di formashon den e instituto. E ta kondená ku firmesa tur forma di violensia, intimidashon, destrukshon di propiedat públiko i komportashon ku ta pone den peliger e seguridat di hóbennan i personal.
Gobièrnu di Kòrsou i e instansianan responsabel lo siguí tuma tur medida nesesario pa garantisá e seguridat di e hóbennan, e personal i e fasilidatnan di JJIC. Nan lo sinti e forsa di Hustisia. Kuerpo Polisial Kòrsou lo kontinuá ku mas investigashon den e kaso aki i lo no ekskluí mas akshon pa trese trankilidat bèk den e instituto.
[FIN DI KOMUNIKADO]
