Publiká riba 09 Yüli 2025
DEN HAAG, – Minister di Hustisia di Kòrsou, Shalten Hato, a realisá un bishita di trabou na embahada di Colombia na Den Haag, kompaña pa Minisrer plenipotensiario, sr. Carls Manuel, i huntu ku su delegashon a reuní ku sra. Carolina Olarte Bácares den kual a trata tópikonan importante pa fortalesé e relashon di koperashon entre e dos paisnan. Durante e reunion, nan a trata diverso tema relashoná ku seguridat i hustisia.
Un di e tópikonan prinsipal tabata e luchanan kontra tráfiko ilegal di hende i droga, i tambe e importansia di skol i formashon kontinuo pa polis. A papia di posibilidat pa amplia e koperashon den kuadro di krímen sibernétiko, un área den kua Colombia tin hopi eksperensia. Tambe a pone énfasis riba e nesesidat di fortalesé e relashon hudisial entre e dos paisnan, pa asina enfrentá desafionan di hustisia ku ta afektá nos region.
Un tópiko importante tabata e situashon di migrantenan, unda nos paisnan ta sigui haña manera pa yuda migrantenan den un forma humano i legal.
Embahada di Colombia a indiká ku próksimamente, di 25 te 29 di ougùstùs, lo tuma lugá un kurso di seguridat sibernétiko na Kòrsou, unda un eksperto di Colombia lo ta presente pa duna instrukshon. Minister Hato i su delegashon a akseptá e invitashon pa partisipá den e kurso, i lo invitá tambe otro funshonario relevante di Ministerio di Hustisia pa hasi uso di e oportunidat di formashon.
Otro punto importante tabata e lucha kontra trafikashon di hende. Kòrsou a splika di su unidat yamá PATH, ku ta spesífikamente dediká pa investigá i kombatí e rednan ku ta involukrá den trafikashon di hende.
Na fin di e reunion, Minister Hato a pidi pa mira kiko ta e posibilidat pa bomberonan di Kòrsou por risibí entrenamentu na Colombia. Esaki ta inkluí formashon den téknikanan relashoná ku outo eléktriko, pènel solar, maneho di kalamidat i desaster natural, pa fortalesé kapasidat di Brantwer Kòrsou den situashon di emergensia.
Ku e bishita aki, Kòrsou i Colombia ta sigui traha huntu pa un region mas seguro i resiliente.
